काठमाडौं – देश र जनताको हितका लागि आफ्नो जीवन बलिदान गर्ने शहीदहरूको स्मरणमा आज देशभर विभिन्न कार्यक्रम गरी शहीद दिवस मनाइँदैछ। प्रजातन्त्र स्थापना र पुनःस्थापनाका क्रममा जीवन आहुति दिने शहीदप्रति श्रद्धाञ्जली अर्पण गर्दै यो दिवस मनाइने गरिएको छ।
नेपालमा प्रजातन्त्र स्थापनाका लागि बलिदान दिने चार अमर शहीद धर्मभक्त माथेमा, दशरथचन्द्र ठाकुर, गङ्गालाल श्रेष्ठ र शुक्रराज शास्त्रीसहित अन्य शहीदको सम्झनामा प्रत्येक वर्ष माघ १६ गते शहीद दिवस मनाइन्छ।
राणा शासनविरुद्ध आवाज उठाएको आरोपमा तत्कालीन सरकारले उहाँहरूलाई मृत्युदण्ड दिएको थियो। शहीदहरूको बलिदानकै प्रेरणाबाट जहानियाँ राणा शासनको अन्त्य भई नेपालमा प्रजातन्त्र स्थापना भएको मानिन्छ।
माघ १० देखि १६ गतेसम्म शहीद सप्ताह मनाइने घोषणा अनुसार देशभर विविध कार्यक्रम आयोजना हुँदै आएका छन्। विसं २०१२ सालदेखि तत्कालीन काठमाडौँ नगरपालिकाको संयोजकत्वमा शहीद दिवस मनाउन थालिएको हो।
स्वतन्त्रताको माग गर्दै आन्दोलन गरेकै कारण १९९७ सालमा शहीद शुक्रराज शास्त्रीलाई माघ १० गते टेकुस्थित पचलीमा, धर्मभक्त माथेमालाई माघ १३ गते सिफलमा तथा गङ्गालाल श्रेष्ठ र दशरथ चन्दलाई माघ १५ गते शोभाभगवतीमा राणा शासकले मृत्युदण्ड दिएका थिए।
