काठमाडौं । हाल नेपालमा पश्चिमी न्यूनचापीय प्रणालीको प्रभाव रहेको मौसम पूर्वानुमान महाशाखाले जनाएको छ।
महाशाखाका अनुसार अहिले गण्डकी, लुम्बिनी, कर्णाली र सुदूरपश्चिम प्रदेशका विभिन्न स्थानमा वर्षा भइरहेको छ। आज साँझसम्म यस प्रणालीका कारण देशका धेरै ठाउँमा हिउँ तथा पानी पर्ने सम्भावना रहेको छ।
आज गण्डकी, लुम्बिनी, कर्णाली र सुदूरपश्चिमका केही स्थानमा मध्यम वर्षा हुने सम्भावना छ भने बागमती, मधेश र कोशी प्रदेशका पहाडी भू–भागका थोरै स्थान तथा कोशीको तराईका एक–दुई स्थानमा हल्का वर्षा हुन सक्ने महाशाखाले जनाएको छ।
यस्तै, लुम्बिनी र सुदूरपश्चिम प्रदेशका थोरै स्थानमा मेघगर्जन र चट्याङ्गको सम्भावना पनि रहेको छ। गण्डकी, कर्णाली र सुदूरपश्चिम प्रदेशका हिमाली भू–भागका एक–दुई स्थानमा भने भारी हिमपात हुन सक्ने चेतावनी दिइएको छ।
महाशाखाका वरिष्ठ मौसमविद् वरुण पौडेलका अनुसार आज बिहानैदेखि देशभर बादल लाग्ने र काठमाडौं उपत्यकामा पनि हल्कादेखि मध्यमसम्म वर्षा हुने सम्भावना छ। पश्चिमी प्रणाली पूर्वतर्फ सर्दै जाँदा कोशी र मधेश प्रदेशमा भने यसको प्रभाव तुलनात्मक रूपमा कम हुने उनले बताए।
त्यस्तै, मौसमविद् विनोद पोखरेलले आज दिनभर अधिकांश स्थानमा हल्का वर्षा हुने र भोलि (बिहीबार)देखि केही ठाउँमा बादल लागे पनि क्रमशः मौसम खुल्दै जाने जानकारी दिए।
