विराटनगर । दीगो तथा सम्मानित रोजगारीका लागि सीप परियोजना (इन्स्योर)ले विराटनगरमा पाँच दिने औद्योगिक प्रशिक्षक तालिम सफलतापूर्वक सम्पन्न गरेको छ ।
कोशी प्रदेशका विभिन्न जिल्लाबाट आइटी, अटोमोबाइल, चिया उद्योग, सञ्चार र होटल व्यवस्थापन क्षेत्रका २० जना उद्योग प्रतिनिधिले यस तालिममा सहभागिता जनाएका थिए ।
प्राविधिक शिक्षा तथा व्यावसायिक तालिम परिषद् (सिटिइभिटी) अन्तर्गतको प्राविधिक प्रशिक्षण प्रतिष्ठान (टिआइटिआई)को समन्वयमा भएको तालिम मंसिर २८ गतेदेखि सुरु भई बिहीबार समापन भएको हो ।
औद्योगिक प्रशिक्षार्थीको व्यवस्थापन, सञ्चालन र सुपरिवेक्षण गर्न सक्षम प्रशिक्षक तयार पार्नु यस तालिमको मुख्य लक्ष्य थियो ।
विराटनगरस्थित होटल इस्टर्न स्टारमा सम्पन्न तालिमको समापन कार्यक्रममा सहभागीहरूलाई सिटिइभिटी कोशी प्रदेशकी निर्देशक मीना पौडेल खरेल र इन्स्योर परियोजनाका टिभेट अधिकृत घनश्याम लिम्बुले प्रमाणपत्र वितरण गरे ।
तालिममा २४ महिने अप्रेन्टिसिप कार्यक्रमका विभिन्न पक्षमा केन्द्रित रह्यो । शिक्षालयमा सैद्धान्तिक ज्ञान प्राप्त गरेर उद्योगमा व्यावहारिक सीप सिक्न आएका प्रशिक्षार्थीलाई कसरी प्रभावकारी ढंगले मार्गदर्शन गर्ने भन्ने विषय मुख्य रूपमा समेटिएको थियो ।
तालिमका सहजकर्ता टिआइटिआईका इन्जिनियरद्वय महेश्वर रेग्मी र कमल लामिछानेले अप्रेन्टिसिप कार्यक्रमको संरचना, प्रशिक्षार्थी-शिक्षालय-उद्योगको त्रिपक्षीय सम्बन्ध, साथै प्रशिक्षक र प्रशिक्षार्थीबीचको प्रभावकारी सञ्चारका विषयमा विस्तृत जानकारी प्रदान गरे ।
समापन कार्यक्रममा बोल्दै सहजकर्ता रेग्मीले इन-कम्पनी ट्रेनर्स ट्रेनिङले औद्योगिक प्रशिक्षकलाई प्रशिक्षार्थी छनोटदेखि मूल्यांकनसम्मको सम्पूर्ण प्रक्रियामा सघाउ पुग्ने विश्वास व्यक्त गरे ।
तालिममा सहभागी भएकाहरूले अप्रेन्टिसिप कार्यक्रममार्फत् आफ्नो संस्थामा जोडिएका प्रशिक्षार्थीहरूको मूल्यांकनमा मात्र नभएर प्रक्रियागत काम–कारबाहीमा पनि तालिमले सहयोग गर्नेमा ढुक्क भएको सुनाए ।
इन्स्योर परियोजनाका टिभेट अधिकृत लिम्बुले यस्ता तालिम पछिल्लो आठ वर्षदेखि नियमित रूपमा सञ्चालन हुँदै आएको जानकारी दिए ।
“औद्योगिक प्रशिक्षार्थीलाई सही मार्गदर्शन दिनका लागि यस्ता तालिम अत्यन्तै आवश्यक छन् । निकट भविष्यमा पनि नयाँ ढाँचाका तालिम सञ्चालन गर्ने योजना छ,” उनले थपे ।
सिटिइभिटी कोशी प्रदेशकी निर्देशक खरेलले तालिमलाई निकै फलदायी बताउँदै सहभागीहरूलाई सिकेका कुरा आफ्नो संस्थामा प्रभावकारी रूपमा लागू गर्न आग्रह गरिन् ।
“कम्पनीमा आबद्ध प्रशिक्षार्थीलाई दक्ष बनाउन कम्पनी प्रशिक्षकको भूमिका अत्यन्तै महत्वपूर्ण हुन्छ,” उनले जोड दिइन् ।
यो तालिम इन्स्योर परियोजना र टिआइटिआईको संयुक्त पहलमा सञ्चालित भएको थियो । तालिमका लागि आइटीतर्फको औद्योगिक प्रशिक्षकहरूको छनोट तथा सहजीकरण भने क्यान महासंघ मोरङका सचिव अजित चापागाईंले गरेका थिए ।
