विराटनगर । युवा प्रतिभा र दक्ष जनशक्ति उत्पादनका लागि गठन भएको आदर्श अप्रेन्टिसीप आल्मुनाई एसोसिएसनले शिक्षालय र उद्योगबीचको अप्रेन्टिसीप कार्यक्रमको समीक्षा गरेको छ ।
विराटनगरस्थित आदर्श माध्यमिक विद्यालयको आइटी र इसिडिएफ अप्रेन्टिसीप कार्यक्रमका स्नातकहरूले गठन गरेको अप्रेन्टिसीप आल्मुनाई एसोसिएसनले उक्त कार्यक्रम गरेको हो ।
चेम्बर अफ इन्डस्ट्रीज मोरङको सेमिनार हलमा शनिबार आयोजित अप्रेन्टिसीप कार्यक्रमको समीक्षा तथा छलफल कार्यक्रम अत्यन्त प्रभावकारी रूपमा सम्पन्न भएको थियो ।
”अप्रेन्टिसीप नै भविष्य हो” भन्ने नारासहित आयोजना गरिएको यस कार्यक्रमले शिक्षालय र उद्योगबीचको सहकार्यलाई नयाँ उचाइमा पुर्याएको विश्वास गरिएको छ ।
कार्यक्रममा उद्योग, शिक्षा र अप्रेन्टिसीप क्षेत्रका अनुभव र सम्भावनाको गहन समीक्षा भएको थियो।
उद्योग संगठन मोरङका अध्यक्ष नन्दकिशोर राठीले अप्रेन्टिसीप कार्यक्रमले दक्ष र आत्मविश्वासी जनशक्ति उत्पादनमा महत्वपूर्ण भूमिका खेल्ने उल्लेख गरे ।
सिटिईभिटी कोशी प्रदेशका उपनिर्देशक दुर्गाप्रसाद ओझाले यसले उद्योगको सीप माग र युवाहरूको क्षमताबीचको अन्तर घटाउने बताए ।
इन्स्योर परियोजना कोशी प्रदेश प्रमुख विकास पन्थीले उद्योग, शिक्षा र सीप विकासबीचको सहकार्यलाई दीर्घकालीन र दिगो बनाउन यस्ता कार्यक्रम आवश्यक रहेको बताए ।
उनले नीति निर्माण र परिणाममुखी प्रणाली विकासमा पनि यस कार्यक्रमको योगदान उच्च रहेको बताए ।
आदर्श माध्यमिक विद्यालयका प्रधानाध्यापक सन्तोष पोखरेलले विद्यालय–उद्योग सहकार्यलाई अझ मजबुत बनाउँदै विद्यार्थीहरूलाई रोजगारीमुखी तथा जीवनोपयोगी सीप प्रदान गर्न अप्रेन्टिसीप कार्यक्रम प्रभावकारी रहेको बताए ।
साथै उनले स्वीस सरकार, नेपाल सरकार, इन्स्योर परियोजना तथा उद्योग प्रतिष्ठानप्रति हार्दिक कृतज्ञता व्यक्त गरे ।
कार्यक्रममा रेखा उप्रेतीको संयोजनमा उद्योग, संघ–संस्था, स्नातक प्रशिक्षार्थी, हाल उद्योगमा कार्यरत प्रशिक्षार्थी, हालै अप्रेन्टिसीपमा भर्ना भएका प्रशिक्षार्थी, इन–कम्पनी प्रशिक्षक, कार्यक्रम संयोजक र सिटिईभिटी प्रतिनिधिहरूको सहभागितामा प्यानल छलफल सञ्चालन गरिएको थियो ।
उक्त कार्यक्रममा कुल १८० भन्दा बढी सहभागीहरू उपस्थित थिए।
साथै प्रेरणादायी सत्रमार्फत रत्नबहादुर बुढाले युवाहरूलाई करियर लक्ष्यप्रति केन्द्रित रहन, निरन्तर परिश्रम गर्न र आत्मविश्वासका साथ अघि बढ्न प्रेरणा दिए ।
अप्रेन्टिसीप कार्यक्रम सफलतापूर्वक सम्पन्न भएका प्रशिक्षार्थीहरूलाई प्रमाणपत्र वितरण गर्नुका साथै ३० भन्दा बढी आई.टी. संस्था, विभिन्न उद्योग प्रतिष्ठान तथा इन–कम्पनी प्रशिक्षकहरूलाई आदर्श अप्रेन्टिसीप अलुमनाई एशोसिएसनद्वारा सम्मान र धन्यवाद प्रदान गरिएको थियो।
अप्रेन्टिसीप कार्यक्रमको सफलताले विद्यार्थीहरूको प्रेरणा बढाउन मद्दत भएको कुरा आदर्श अप्रेन्टिसीप आल्मुनाई एसोसिएसनकी सचिव अनजुम आराले उल्लेख गरिन् ।
कार्यक्रम अप्रेन्टिसीप आल्मुनाई एसोसिएसनका अध्यक्ष विक्रम साहको अध्यक्षतामा सम्पन्न भएको थियो।
