नेपाली कांग्रेसको आसन्न १५औं महाधिवेशनमा विराटनगर महानगरपालिका सभापतिका लागि युवा नेता अभिषेक गिरीको उम्मेदवारी चर्चाको केन्द्रबिन्दु बनेको छ। पुस २६ देखि २८ गतेसम्म काठमाडौंमा हुने कांग्रेसको १५औं महाधिवेशनअघि सम्पन्न हुने महानगरको अधिवेशनमा सामाजिक अभियन्तासमेत रहेका गिरी सभापतिका लागि तयारी थालेको स्रोतले जनाएको छ।
लामो समयदेखि विराटनगरमा कांग्रेसलाई सशक्त र बृहत् बनाउने अभियानमा सक्रिय रहेका गिरीले पहिलोपटक नेतृत्वमा इच्छा जताएको भन्दै युवा कार्यकर्ताहरू आशावादी देखिएका छन्। शुक्रबार गिरीले कांग्रेससँग आस्था राख्ने युवा र जेनजीका केही अगुवासँग भएको छलफल गरेका थिए, जसमा अधिकांशले उनलाई महानगर सभापति बन्न सुझाव दिएका थिए।
छलफलमा सहभागीहरूले गिरी सभापति बनेमा कांग्रेस आबद्ध मात्र नभई अन्य युवापुस्तालाई पनि समेट्न सकिने विश्वास व्यक्त गरेका छन्। हालैमात्र भएको जेनजी विद्रोहपछि युवाले राजनीतिमा आउनुपर्छ भन्ने माग सर्वत्र उठिरहेका बेला गिरी महनगरको नेतृत्वमा आउँदा पार्टीभित्र र बाहिर दुवैतर्फबाट उनको नाममा सहमति बन्दै जाने उनीहरूको भनाइ थियो।
आफ्नो संयोजनमा रहेको गिरी फाउन्डेसनमार्फत सामाजिक कार्यहरूमा सक्रिय रहेका गिरी समाज सेवासँगसँगै पार्टीका अन्य गतिविधिहरूमा पनि उत्तिकै सक्रिय छन्। केही समयअगाडि उनले गिरी फाउन्डेसनमार्फत नेपाली कांग्रेसका अग्रज नेता–कार्यकर्तालाई सम्मान गरेका थिए।
गिरीले विराटनगर महानगरपालिका–८ का ७५ जना पुराना नेता कार्यकर्तालाई प्रमाणपत्रसहित सम्मान गरेका थिए। पार्टीका लागि दिएको अतुलनीय योगदानको कदर गर्दै अग्रज नेता–कार्यकर्तालाई सम्मान गरेका गिरी युवामाझ मात्र नभएर ज्येष्ठ सदस्यहरुबीच पनि उत्तिकै चर्चित छन्।
यसै कुरालाई मध्येनजर गरेर गिरीले संगठनलाई अझ विस्तार गर्ने लक्ष्यसहित पार्टी प्रवेश गर्ने कामलाई निरन्तरता दिइरहेका छन्। शनिबार (भोलि) पनि उनकै अगुवाइमा करिब डेढ सय जनालाई पार्टीमा प्रवेश गराउने तयारी रहेको बताइएको छ।
नेपाली कांग्रेसको सिद्धान्त तथा विचारलाई आत्मसात गर्दै लोकतन्त्रको चीरस्थायी प्रयोजनमा आफूलाई समाहित गर्ने उद्देश्यबाट अभिप्रेरित भई विभिन्न तहतप्कामा रहेका व्यक्तिहरूलाई नेपाली कांग्रेस पार्टीमा प्रवेश गराउन लागिएको गिरीको भनाइ छ।
विराटनगर सभापतिको दाबेदारीका विषयमा भने गिरीले युवापुस्ताको साथ र पार्टीको निर्देशन भएमा नेतृत्व लिन तयार रहेको स्वीकारेका छन्। गिरी सार्वजनिक तथा निजी अस्पताल सुधार, सामुदायिक विद्यालय सुधार, सार्वजनिक सम्पत्तिको संरक्षण, स्वदेशमै रोजगारी, सरसफाइ अभियान, कोशी अस्पताल सुधार अभियान, वृक्षारोपण अभियान, प्राकृतिक प्रकोप उद्दारमा हरहमेशा खटिने गरेका छन्।
कांग्रेस विराटनगर महानगरको नेतृत्व चयनले मोरङको राजनीतिमा महत्त्वपूर्ण प्रभाव पार्ने भएकाले यसपटकको महाधिवेशन विशेष चासोको विषय बनेको छ।
