विराटनगर । संघीय शिक्षा ऐनअन्तर्गत निजी विद्यालय बन्द गर्ने गरी ल्याउन लागिएको नीतिविरुद्ध भन्दै विराटनगरमा प्रदेशस्तरीय प्रदर्शन भएको छ ।
प्रदेश राजधानी विराटनगरमा सोमबार प्याब्सन, एन–प्याब्सन, हिसान र अपेनको संयुक्त आयोजनामा विरोध प्रदर्शन भएको हो ।
हातमा कालोपट्टी बाँधेर उनीहरू सडकमा उत्रिएका थिए भने उल्टो साइकल चलाएर पनि सांकेतिक रूपमा विरोध प्रदर्शन भएको थियो ।
विराटनगरको महेन्द्रचोकबाट सुरु भएको प्रर्दशन देवकोटा चोकमा कोणसभापछि समापन भएको थियो ।
कोणसभामा प्याब्सनका पूर्वकेन्द्रीय अध्यक्ष टिकाराम पुरी, हिसानका केन्द्रीय उपाध्यक्ष भेषराज पोखरेललगायतले सम्बोधन गरे ।
उनीहरूले सरकारले ल्याउन लागेको नीति शिक्षा क्षेत्रका लागि हानिकारक हुने बताउँदै निजी विद्यालयको स्वतन्त्रता तथा विद्यार्थीको शिक्षाको अधिकार सुनिश्चित गर्न माग गरे ।
आन्दोलनकारीको भिडलाई नियन्त्रण गर्न उल्लेख्य मात्रामा सुरक्षाकर्मी परिचालन गरिएको थियो ।
