काठमाडौं । १३४औं डुरान कपअन्तर्गत नेपाली राष्ट्रिय टोलीका फरवार्ड अञ्जन विष्ट सम्मिलित रियल कश्मीर एफसी विजयी भएको छ ।
खुमन लम्पाक रंगशालामा भएको समूह ‘एफ’ को खेलमा कश्मीरले ट्राउ एफसीलाई २–१ ले पराजित गरेको हो ।
२० हजार दर्शकमाझ भएको खेलमा रियल कश्मीरका रोहेन सिंहले ६४औं मिनेटमा पेनाल्टी बक्सभन्दा बाहिरबाट हानेको गोल निर्णायक बन्यो ।
खेलको २४औं मिनेटमा रोहेनकै पासबाट मरात तारेकले रियल कश्मीरलाई अग्रता दिलाएका थिए ।
तर, एक मिनेटमै ट्राउका अफ्रिदी बुइमायुमले बराबरी गोल फर्काए। दोस्रो हाफमा रोहेनको गोलले फेरि कश्मीरलाई अग्रता दिलायो ।
७७औं मिनेटमा ट्राउका कप्तान शितलजित अटोम दोहोरो पहेँलो कार्ड पाएपछि मैदानबाट बाहिरिए ।
खेलको अन्त्यसम्म १० खेलाडीमा सीमित ट्राउले बराबरी गोल खोज्ने प्रयास गरे पनि कश्मीरको डिफेन्डडरले रोके ।
रियल कश्मीरले अब अगस्ट १० मा नेरोकासँग भिड्नेछ भने ट्राउले अगस्ट १२ मा इन्डियन नेभी एफसीको सामना गर्नेछ ।
