विराटनगर । विराटनगर महानगरपालिका-८ हाटखोलास्थित जिल्ला कारागार मोरङमा गिरी फाउन्डेसनले रक्तदान कार्यक्रम आयोजना गरेको छ ।
जेनजी आन्दोलनका घाइतेहरू र देशभर आएको बाढी-पहिरोमा परी घाइते भएकाहरूलाई मध्येनजर गर्दै फाउन्डेसनले यो कार्यक्रम आयोजना गरेको हो ।
नेपाल रेडक्रस सोसाइटी मोरङको प्राविधिक सहयोग र गिरी फाउन्डेसनको संयोजनमा बिहीबार कारागारभित्र सम्पन्न कार्यक्रममा एक सय ४३ पिन्ट रगत संकलन गरिएको छ ।
रक्तदान जीवनदान भन्ने मूल नाराका साथ कैदीबन्दी स्वतस्फूर्त रूपमा रक्तदान कार्यक्रममा सहभागी भइ रगत दान दिएको फाउन्डेसनका अध्यक्ष अभिषेक गिरीले बताए ।
जेनजी आन्दोलनका क्रममा देशैभरिका कैदीहरू कारागार छोडेर भाग्दासमेत अनुशासित परिचय दिएका मोरङ कारागारका कैदीहरू देशलाई योगदान दिने मानवीय कार्यमा जुटेको गिरीको भनाइ छ ।
चौतर्फी ब्लडको आवश्यकता भइरहेको परिस्थितिमा मोरङ कारागारका कैदीहरूले रगत अभाव टार्न प्रयास गरेको गिरीले बताए ।
यसैगरी मोरङका प्रमुख जिल्ला अधिकारी ईन्द्रदेव यादवले समग्र देशकै स्वास्थ्योवस्थालाई मध्यनजर गरेर गिरी फाउन्डेसनले रक्तदानको कार्यक्रम आयोजना गरेर पुण्यको काम गरेकाे बताए ।
मोरङ कारागारका जेलर गौरव ढुंगेलले कारागारभित्र रहेका कैदीबन्दीहरूले समाजमा केही योगदान गर्न सकिन्छ कि भनेर स्वतस्फूर्त रूपमा रक्तदान कार्यक्रमको आयोजना गरेको सुनाए ।
यता, रेडक्रस मोरङका सभापति सुखदेव मण्डलले धेरै अस्पताल रहेको जिल्लामा बिरामीको चाप पनि उत्तिकै बढ्दा रगत अभाव देखिँदै गएको बताए ।
यस समस्या समाधानका लागि पनि गिरी फाउन्डेसनसँग सहकार्यमा रक्तदान कार्यक्रम आयोजना गरिएको उनको भनाइ छ ।
समाजसेवी अभिषेक गिरीको यस फाउन्डेसनले स्थापनाकालयता निरन्तर रूपमा सामाजिक कार्यहरू गर्दै आएको छ ।
