काठमाडौं । झन्डै २७ महिनादेखि अखिल नेपाल फुटबल संघ (एन्फा)ले सहिद स्मारक ‘ए’ डिभिजन लिग गर्न सकेको छैन ।
यसै कारण पनि नेपालको राजधानी काठमाडौंमा फुटबल मैदान खाली छन् ।
तर, बंगलादेशको ढाकामा भने नेपाली खेलाडीहरूको संख्या बढ्दै गएको छ ।
लिग हुन नसकेपछि नेपाली खेलाडीहरूले आफ्नो भविष्य विदेशी लिगमा खोज्न थालेका हुन् ।
नेपाली खेलाडीहरूले बंगलादेश प्रिमियर लिग (बिपिएल) क्लब ब्रदर्स युनियनसँग नयाँ सम्झौता थपेका छन् ।
राष्ट्रिय टोलीका डिफेन्डरद्वय एरिक विष्ट र सनीश श्रेष्ठ तथा फरवार्ड अञ्जन विष्ट र मिडफिल्डर योगेश गुरुङले संयुक्त रूपमा ब्रदर्श युनियनसँग २०२५/२६ सिजनका लागि सम्झौता गरेका छन् ।
उनीहरू ढाकास्थित क्लबको प्रि–सिजन प्रशिक्षणमा सहभागी भएका छन् ।
ब्रदर्स युनियन अहिले बीपीएलमा सबैभन्दा धेरै नेपाली खेलाडी राख्ने क्लब बनेको छ ।
बंगलादेश फुटबल महासंघले ल्याएको साफ कोटा नियमले यो सजिलो भएको हो, जसले दक्षिण एसियाली खेलाडीलाई स्थानीय खेलाडीकै रूपमा दर्ता गर्न अनुमति दिन्छ ।
नेपालमा घरेलु लिग अनिश्चित भएको कारण खेलाडीहरूले बंगलादेशलाई पहिलो रोजाइ बनाउन थालेका छन् ।
ढाकामा हुने उनीहरूको प्रदर्शनले नेपाली फुटबललाई अन्तर्राष्ट्रिय स्तरमा चिनाउन सक्ने आशा गरिएको छ ।
