विराटनगर । मोरङको बुढीगङ्गा गाउँपालिकाको एउटा सानो बस्ती । जहाँ घटस्थापनाको सुरुवातसँगै गाउँमा दशैंको तयारी चल्दै थियो । तर, सोही असोज ६ गते घटस्थापनाको साँझ जन्मदिनको उत्सवको नाममा एउटा यस्तो घटना भयो, जसले गाउँ मात्र होइन, सम्पूर्ण समुदायलाई नै स्तब्ध बनाईदियो ।
बुढीगङ्गा गाउँपालिका वडा नं. १ बस्ने वर्ष १७ का सञ्जय (परिवर्तित नाम) आफ्नो जन्मदिन मनाउने तयारीमा थिए । विराटनगर महानगरपालिका वडा नं. २ मा रहेको हङग्री स्टेशन क्याफेमा उनी काम गर्थे । घटस्थापनाको रमझम हेर्ने गरी विराटनगरस्थित सेन्ट्रल मल घुम्न पुगेका उनी दुईजना बालिकाहरुसँग ठोक्किए ।
ती बालिकाहरु थिईन, बुढीगङ्गा–१ बस्ने सञ्जयकै साथी वर्ष १४ की सिर्जना र उनको साथी अञ्जना (परिवर्तित नाम) । आफ्नै गाउँठाउँमा कतै देखेजस्तो लागेपछि सञ्जयले सिर्जनासँग सेन्ट्रल मल घुम्न आएकी अञ्जनासँग चिनजान गरे । परिचय भयो, चिनजान भयो, घरपनि एउटै वडामा भएको थाहा भयो । त्यसपछि तीनैजनाले सँगै घुमफिर गर्ने निधो गरे र केही समयसम्म सेन्ट्रल मलसहित बजार क्षेत्र घुमफिर गरे । घुमफिरकै क्रममा सञ्जयले आज आफ्नो जन्मदिन रहेको र केक काटने इच्छा रहेको भन्दै दुवै बालिकालाई केक काट्न निम्तो गरे । सुरुमा अञ्जनाले मानिनन्, तर सिर्जनाले सञ्जय आफ्नै गाउँठाउँको मान्छे भएको, डराउनुपर्दैन भनेपछि सहमतिमै तीनैजना विराटनगर–२ स्थित हङ्ग्री स्टेशन क्याफे पुगे । सुरुमा माहोल रमाईलै थियो, केक काटियो, हाँसोठट्टा चल्यो, हुक्का पनि सेवन भयो । तर, त्यही रमाइलो साँझ रातको भयानक अन्धकारमा बदलियो ।
राति करिब साढे ९ बजे सञ्जयसहित दुवैजना बालिकाहरु क्याफेबाट बाहिरिए । बालिकाहरुले घर फर्किन ढिलो भईसकेको र आफुहरु आज साथीको घरमा बस्न जाने बताएपछि सञ्जयले राती खानबस्न गाह्रो नहुने भन्दै आफुले व्यवस्था गरेको ठाउँमा बस्न आग्रह गरे । उनले उनीहरूलाई विराटनगर–१९ बैजनाथपुरस्थित आफ्नै साहुको घरमा लगे, जहाँ उनी आफैपनि बस्दै आएका थिए र घर रेखदेखकोे जिम्मेवारी समेत पाएका थिए । त्यही घरमा, मध्यरातको निस्तब्ध समयमा, सञ्जयले दुवै बालिकामाथि पालैपालो जबरजस्ती करणी गरे । त्यो एकरातले दुवै बालिकाको जीवन अन्धकारमय बनाईदियो ।
घुमफिर गर्ने भने घरबाट निस्किएका बालिकाहरु रात अबेरसम्म घर नफर्किएपछि चिन्तित बनेका परिवारले प्रहरीमा सम्पर्क गरे । प्रहरी र अभिभावकले रातभरि बालिकाहरुको सोधीखोजी गरे । विद्यालयमा समेत सम्पर्क गरे । तर बालिकाहरु कतै भेटिएनन र उनीहरुसँग सम्पर्क पनि हुन सकेन । भोलिपल्ट बिहान, आफै घर फर्किएका उनीहरुसँग परिवारले सोधीखोजी गर्दा बालिकाहरूले आफ्नो परिवारलाई सबै कुरा खुलाए । रुँदै गरेका छोरीहरूको आवाजले घरपरिवार स्तब्ध भयो । तत्कालै प्रहरीमा जाहेरी दिइयो । असोज ७ गते विराटनगर–२ स्थित क्याफेमै काम गरिरहेको अवस्थामा प्रहरीले सञ्जयलाई पक्राउ गर्यो ।
मोरङ प्रहरीका अनुसार अनुसन्धानपछि सञ्जयलाई बालसुधार गृहमा पठाइएको छ । मेडिकल रिपोर्टले पनि घटनाको पुष्टि गरेको मोरङ प्रहरी प्रवक्ता प्रहरी नायब उपरीक्षक कोपिला चुँडालले बताईन् । ‘जबरजस्ती करणी कसुरमा मुद्दा चलाईएको छ । पिडकको मेडिकल रिपोर्ट नै उसलाई उन्मुक्ति दिने खालको छैन,’ उनीले भनिन, ‘बकपत्रको प्रक्रिया मात्र बाँकी छ ।’
नाबालकबाट पालैपालो करणीको शिकार भएकीमध्ये अञ्जना सुदुरपश्चिम प्रदेशको कालिकोट घर भई बुढीगङ्गा गाउँपालिका वडा नं. १ स्थित दिदिभिनाजुसँग बस्दै आएकी छन् । आफ्नै साथीमार्फत चिनजान भएको मान्छेबाट करणीको शिकार भएकी अञ्जनाको शरीरको विभिन्न भागमा निलडाम देखिएको उनी अध्ययनरत विद्यालयका प्रधानाध्यापकले बताएका छन् । ‘घटना भएको भोलिपल्ट बालिकाहरु घर फर्किएको थाहा पाएपछि म पुगेको थिए । उनीहरुको अवस्थामा दयनीय थियो,’ प्रधानाध्यापकले भने, ‘अञ्जनाको घाँटी र गालामा टोकेको डाम थियो । बालिकाहरुको मायालाग्दो अवस्था देखेपछि हामीपनि स्तब्ध भयौं ।’
पिडितमध्येकी अर्की बालिका सिर्जना भने स्थायी रुपमै बुढीगङ्गा–१ बस्दै आएकी छन् । उनैले अञ्जनालाई सञ्जयसँग परिचय गराएकी हुन् । सञ्जय र सिर्जनाको भने पहिल्यैदेखि चिनजान रहेको स्थानीयले समेत बताएका छन् । स्थानीयका अनुसार दुवैजना पिडितहरु सोही ठाउँको एक सामुदायिक विद्यालयमा कक्षा ७ मा अध्ययनरत छन् ।
प्रहरीका अनुसार नेपालमा भने १४ वर्षदेखि १६ वर्ष उमेर समुहमाथि जबरजस्ती करणीको कसुर पुष्टि भएमा १२ देखि १४ वर्षसम्म कैद, ५ लाख रुपैयाँ जरिवाना र उचित क्षतिपूर्ति हुने व्यवस्था गरिएको छ ।
