विराटनगर । सूर्यदेवको श्रद्धा भक्तिपूर्वक पूजा आराधना गरी मनाइने छठपर्वको अवसरमा विराटनगरमा साँस्कृतिक कार्यक्रम आयोजना गरिएको छ ।
विराटनगर महानगरपालिका-८ स्थित छठीमाई मन्दिर प्रांगणमा छठ पूजा समितिले मंगलबार साँझ भव्य रूपमा साँस्कृतिक कार्यक्रमको आयोजना गरेको हो ।
कार्यक्रममा स्थानीय कलाकारहरूले आफ्नो प्रस्तुती दिएको आयोजक संस्थाका राजन रोयले जानकारी दिए । बर्सेनि छठ पर्वको अवसर पारेर यस्ता साँस्कृतिक कार्यक्रमको आयोजना गर्ने गरिएको उनको भनाइ छ ।
विराटनगर महानगरपालिकाका प्रमुख नागेश कोइरालाको प्रमुख आतिथ्यता तथा विघठित प्रतिनिधिसभा सदस्य अमनलाल मोदी र सामाजिक अभियन्ता अभिषेक गिरीको विशिष्ठ आतिथ्यतामा आयोजित कार्यक्रममा विराटनगर-८ का वडाध्यक्ष राम पोखरेललगायतको उपस्थिति थियो ।
कार्यक्रममा अतिथिहरूले तिहारको समापनपछि हुने छठ पर्वको महत्त्वको दर्शाउँदै हाम्रो संस्कृति जोगाउन यस्ता कार्यक्रमको अथक योगदान हुने उल्लेख गरेका थिए ।
