विराटनगर । जेनजी विद्रोहको आडमा देशभरिका कैदीबन्दी भाग्दा अनुशासित बनेर कारागारमै बसेका मोरङ कारागारका कैदीबन्दीले सांस्कृतिक कार्यक्रम आयोजना गरेका छन् । कारागार परिसरमा पुरुष कैदीबन्दीले दसैं, तिहार र छठ पर्वको संयुक्त रूपमा शुभकामना आदान–प्रदान गर्दै सांस्कृतिक र मनोरञ्जनात्मक कार्यक्रम आयोजना गरेका हुन् ।
विराटनगर महानगरपालिका प्रमुख नागेश कोइरालाको प्रमुख आतिथ्यता र सामाजिक अभियन्ता अभिषेक गिरीको विशिष्ठ आतिथ्यतामा सम्पन्न कार्यक्रममा कैदीबन्दीसहितका कलाकारले आफ्नो प्रस्तुति दिएका थिए । प्रमुख अतिथि कोइरालाले कैदीबन्दीको सीप र कार्यकौशलले बनेका सामाग्रीहरूको अवलोकन गर्दै यसमा महानगरले पनि सहयोग गर्ने प्रतिबद्धता जनाएका थिए ।
यसैगरी, युवा अभियन्ता गिरीले जेनजी आन्दोलनको समयमा भागेर देशभरिका कैदीबन्दीले स्वयमलाई बदनाम गरेका बेला अनुशासित भएर कारागारमै बसेका मोरङ कारागारका कैदीबन्दीको धैर्यता र अनुशासनका कारण पनि यो कार्यक्रम सफल भएको सुनाए ।
यता, कारागारका जेलर गौरव ढुंगेलले कैदीबन्दीकै माग अनुसार उनीहरूलाई मनोरञ्जन प्रदान गर्नका लागि सभ्य र भव्य ढंगले कार्यक्रम गरिएको बताए । अन्य कारागारहरूमा पनि यस्ताखाले कार्यक्रमहरू सञ्चालन हुँदै आएको उनको भनाइ छ ।
विराटनगरको हाटखोलास्थित मोरङ कारागारमा अहिले एक हजारभन्दा बढी कैदीबन्दी रहेका छन् । विशेषगरी पुरुष कैदीबन्दीलाई लक्षित गरेर कारागारको आन्तरिक प्रशासनले शनिबार सांस्कृतिक र मनोरञ्जनात्म कार्यक्रमको आयोजना गरिएको बताइएको छ ।
