विराटनगर । देशकै नमुना खानेपानी आयोजनाका रूपमा चिनिएको विराट खानेपानी तथा सरसफाइ उपभोक्ता संस्थाअन्तर्गतको मानगढ खानेपानी आयोजनाको निर्वाचन आगामी जेठ १० गते हुने भएको छ ।
जिल्ला प्रशासन कार्यालयमा बिहीबार बसेको सर्वपक्षीय बैठकले आगामी जेठ १० गते पुनः निर्वाचन प्रक्रिया थाल्नेगरी सहमति भएको हो ।
सिडिओ कार्यालयमा प्रमुख जिल्ला अधिकारी ईन्द्रदेव यादव, संघीय खानेपानी आयोजनाका प्रमुख सुरतलाल चौधरी, अध्यक्षका उम्मेदवारहरू राम घिमिरे, लालमणि भट्टराई र दुर्गा चापागाईं, खानेपानी समितिका प्रधिनिधि, सरोकारवाला वडाका वडाध्यक्ष, जिल्ला सुरक्षा समितिका प्रतिनिधिहरू सहभागी बैठकले यस्तो निर्णय गरेको हो ।
अध्यक्षका उम्मेदवार तथा निवर्तमान अध्यक्ष राम घिमिरेका अनुसार निर्वाचन १० गते गर्नेगरी सहमति भए पनि प्रक्रिया र मतदानस्थलबारे आगामी बुधबार पुनः बैठक बसेर निर्क्यौल हुने छ ।
औपचारिक सूचना भने मतदान सुरु हुनुभन्दा १५ दिनअगाडि दिइने उनको भनाइ छ ।
यस्तै, अध्यक्ष पदका अर्का उम्मेदवार लालमणी भट्टराईले निर्वाचन समिति गठन तथा मतदानस्थलका विषयमा अर्को बैठकले तय गर्ने बताए ।
उनका अनुसार सिडियोले स्थलगत अनुगमन गरेर मतदानस्थलको छिनोफानो गर्ने छन् भने सुरक्षा व्यवस्थाका लागि सबै सुरक्षा निकायले तत्परता देखाएका छन् ।
गत जेठ १९ गते विराट खानेपानी तथा सरसफाइ उपभोक्ता संस्थाको नयाँ नेतृत्वका लागि निर्वाचन भएको थियो ।
खानेपानीको निर्वाचनमा नेकपा एमाले मोरङ नेतृत्व दुई धारमा बाँडिएको थियो । खानेपानी निर्वाचनकै विवादका कारण तत्कालीन महानगर अध्यक्ष सागर थापाको जिम्मेवारी खोसिएको थियो ।
पाँच हजार नौ सय घरधुरी सदस्य रहेको खानेपानी व्यवस्थापनका लागि मतदान हुँदा सबै मतदाताले मत हाल्न पाएका थिएनन् ।
मतदान भइरहेको बेला साँझपख मतदानस्थलमा भएको विवादले मतदान प्रकिया नै भाँडिएको थियो ।
अध्यक्ष पदका उम्मेदवार रामबहादुर घिमिरे पक्षले धाँधली गर्न खोजेको भन्दै अर्को पक्षले मतदानस्थलमा होहल्ला गरेपछि अन्तिम समयमा मतदान रोकिएको थियो ।
मतदान गर्न नपाएका सदस्यका लागि जेठ २० गते समय तोकिए पनि विवादका कारण मतदान भएको थिएन ।
खसेको मतलाई गणना गर्नुपर्ने माग राख्दै दिव्यराज कट्टेलसमेत ३ जना उच्च अदालत पुगेका थिए ।
टंकप्रसाद खतिवडासमेत ३ जना पुनः मतदानको मागसहित अदालत पुगेका थिए ।
अन्तिम सुनुवाइका क्रममा सोमबार उच्च अदालतले कट्टेलसहित ३ जनाको रिट खारेज गरेको छ ।
खतिवडासहितको मागदाबी अनुसार नयाँ नेतृत्वका लागि निर्वाचन गर्न अदालतले रिट जारी गरेको थियो ।
वार्षिक ६ अर्ब बढीको आर्थिक कारोबार गर्ने विराट खानेपानी तथा सरसफाइ उपभोक्ता संस्थाअन्तर्गतको मानगढ खानेपानी आयोजनाको अध्यक्ष बन्न फेरि तीनै जना अगाडि सरेका छन् ।
नेकपा एमालेबाट निवर्तमान अध्यक्षसमेत रहेका रामबहादुर घिमिरे र लालमणि भट्टराई तथा नेपाली कांग्रेसबाट दुर्गा चापागाईं प्यानल नै चुनावी मैदान उत्रिने छन् ।
रोकिएको मतदानसम्बन्धी विवादलाई उच्च अदालत विराटनगरले पुरानै उम्मेदवार यथावत् राखेर पुनः मतदानको आदेश दिएपछि अहिले उम्मेदवारहरू व्यक्तिगत रुपमा घरदैलोमा केन्द्रित भइसकेका छन् ।
मानगढ खानेपानी आयोजनाबाट वितरित खानेपानी हाल करिब ६ हजार घरधुरीले उपभोग गर्दै आएका छन् । तिनै उपभोक्ता मतदाता हुन् ।
