विराटनगर । विराटनगर-१० मेनरोडमा अवस्थित कान्तिपुर कलेजले कक्षा १२ मा पढ्ने आफ्ना विद्यार्थीहरूलाई बिदाइ गरेको छ ।
होटल इस्टर्न स्टारमा शनिबार विविध कार्यक्रमहरूको आयोजना गर्दै कलेजले १०औं ब्याचका विद्यार्थीहरूलाई बिदाइ गरेको हो ।
कक्षाको अध्ययन पूरा गरी वार्षिक परीक्षाको तयारीमा रहेका विज्ञान विषयमा कक्षा १२ मा अध्ययनरत चार सय ५० जना विद्यार्थीलाई बिदाइ गरिएको हो ।
उनीहरूलाई कलेकका प्रिन्सिपल भेषराज नेपाल ‘भुवन’ ले मायाको चिनो प्रदान गर्दै बिदाइ गरे । बिदाइ कार्यक्रममा बोल्दै प्रिन्सिपल नेपालले विद्यार्थीहरूलाई उज्ज्वल भविष्यको कामना गरे ।
१२ को जाँच दिएर उच्च शिक्षाको प्रारम्भ गर्न लागेका विद्यार्थीहरूलाई प्राडा. तेजनारायण मण्डल, विष्णु दाहाल, डा. जनक अधिकारी, हिमालय बराल, शंकर काफ्ले लगायतले उज्ज्वल भविष्यको कामनासहित बिदाइ गरेका थिए ।
सोही अवसरमा कक्षा ११ मा पढ्ने विद्यार्थीहरूले नृत्य, गायन र क्यारिकेचर गर्दै उपस्थित अतिथि, शिक्षक-शिक्षिका तथा अभिभावकलाई मनोरञ्जन दिलाएका थिए ।
बिदाइ कार्यक्रमकै अवसर पारेर कलेजले कान्तिपुरमा अध्ययन पूरा गरी पूर्ण छात्रवृत्तिमा नाम निकाल्न सफल सात जना विद्यार्थीलाई सम्मान गरेको थियो ।
यसरी समानित हुनेमा मेडिकलतर्फ एमबिबिएसमा पूर्ण छात्रवृत्तिमा नाम निकाल्न सफल राजु महतो, सोनिया कामत, अरुण चौधरी, निश्चल बस्नेत, विराज अधिकारी, दिप्ती श्रेष्ठ तथा इन्जिनियरिङतर्फ प्रशान्त यादव, रन्जन खतिवडा, रोजन अधिकारीलगायत रहेका छन् ।
त्यसैगरी, कक्षा १२ को हिसान परीक्षा र कक्षा ११ को आन्तरिक परीक्षामा उत्कृष्ट नतिजा ल्याउने ४० जना विद्यार्थीहरूलाई नगद प्रमाणपत्रका साथै ३० लाख बराबरको छात्रवृत्ति प्रदान गरिएको थियो ।
सम्मानित विद्यार्थीहरूले कान्तिपुरमा अध्ययन गरेर शैक्षिक भविष्य सुनिश्चित गर्ने बाटो सहज बनाउन पाएको भन्दै खुसी व्यक्त गरे ।
कक्षा १२ मा वार्षिक परीक्षा दिने एक हजार ६४ जना विद्यार्थीमध्ये म्यानेजमेन्ट र होटल म्यानेजमेन्टको बिदाइ कार्यक्रम यसअघि नै सम्पन्न भएको थियो ।
कलेजले शनिबार नै पोस्टर प्रेजेन्टेसन कम्पिटिसन आयोजना गरेको थियो । रसायन र भौतिक विज्ञान संकायका विद्यार्थीहरूको सहभागितामा भएको पोस्टर प्रतियोगिताका विजेता विद्यार्थीलाई नगद पुरस्कार प्रदान गरिएको थियो ।
प्रोफेसर डाक्टर शिवनारायण यादव निर्णायक रहेको यस प्रतियोगिताका विजेता, उपविजेता, तेस्रो र चौथो हुनेलाई क्रमश: पाँच हजार, तीन हजार, दुई हजार र १५ सय रुपैयाँ प्रदान गरिएको थियो ।
कार्यक्रममा बोल्दै कलेजका अध्यक्ष खुसीराज श्रेष्ठले परीक्षाका लागि राम्रो तयारी गर्न सुझाव दिए ।
कार्यक्रममा विज्ञान संकायका कोर्डिनेटर हिमाल बराल, व्यवस्थापन संकायका कोर्डिनेटर रोशनलाल राजवंशी, भाइस प्रिन्सिपल देवीलाल महतो, कलेजका फाउन्डर शंकर काफ्ले, निर्देशकहरू प्रा.डा. टिएन मण्डल, जनक अधिकारी, श्यामनारायण साह, कृष्ण भण्डारी, सन्तोष भगतलगायतको उपस्थिति रहेको थियो ।
कोशी प्रदेशकै उत्कृष्ट कलेजका रूपमा स्थापित हुँदै कान्तिपुरमा गरेको विज्ञान, कम्प्युटर विज्ञान, व्यवस्थापन, होटल व्यवस्थापन गरी प्ले ग्रूपदेखि कक्षा १२ सम्म करिब तीन हजार विद्यार्थीहरू अध्ययनरत छन् ।
