विराटनगर । स्वतन्त्र विद्यार्थी युनियनको मंगलबार भएको निर्वाचनमा मोरङका ७ वटा क्याम्पसमध्ये चार वटामा अखिल क्रान्तिकारी विजयी भएको छ ।
अहिलेसम्म परिणाम सार्वजनिक भएकोमध्ये परिणाममा त्रिभुवन विश्वविद्यालयका दुई आंगीकसहित चार वटामा अखिल क्रान्तिकारी विजयी भएको हो ।
यस्तै एउटामा नेविसंघ र दुई वटामा अनेरास्ववियुले जित हासिल गरेको छ ।
मोरङका ३ आंगिक र ५ सामुदायिक क्याम्पसमा मंगलबार निर्वाचन भएको थियो । तीमध्ये केही स्थानको मतगणनासमेत सम्पन्न भइरहेको छ ।
मोरङका तीन अंगीक क्याम्पसमध्ये विराटनगरको डिग्री क्याम्पसमा र विराटनगर नरसिंह क्याम्पसमा अखिल क्रान्तिकारी विजयी भएको छ ।
डिग्री क्याम्पसमा क्रान्तिकारीका प्रीतम साहको प्यानलै निर्वाचित भएको छ भने नर्सिङ क्याम्पसको सभापतिमा पनि अखिल क्रान्तिकारीका रोहित ताजपुरिया निर्वाचित भएका छन् ।
मोरङको कानेपोखरीस्थित रमाइलो क्याम्पसको सभापतिमा अखिल क्रान्तिकारीका अनिश कार्की निर्वाचित भएका छन् ।
यस्तै मोरङको मिक्लाजुङ क्याम्पसको सभापतिमा अखिल क्रान्तिकारीका सुजन घिमिरेको प्यानलै निर्वाचित भएको छ ।
यस्तै, केरावारीस्थित खदम क्याम्पसको सभापतिमा अनेरास्ववियुका सङ्गम कन्दङ्वा निर्वाचित भएका छन् ।
सुन्दरहरैंचा स्थित सुकुना बहुमुखी क्याम्पसको सभापतिमा अनेरास्ववियुका एलिस ओझा निर्वाचित भएका छन् ।
पथरी बहुमुखी क्याम्पसको सभापतिमा नेविसंघका केशर राई निर्वाचित भएका छन् ।
पूर्वकै सबैभन्दा ठूलो क्याम्पस विराटनगरको महेन्द्र मोरङ क्याम्पसमा पछिल्लो मतपरिणामअनुसार अखिल क्रान्तिकारी नै अगाडि देखिएको छ ।
महेन्द्र मोरङ क्याम्पस, विराटनगरमा अखिल क्रान्तिकारीका रोहित यादवले ४१२ मतसहित अग्रता लिएका छन् ।
उनलाई पछाइरहेका नेविसंघका उम्मेदवारले ३८१ मत प्राप्त गरेका छन् ।
