फाइल तस्बिर विराटनगर । मोरङ जिल्लाको विराटनगर महानगरपालिका-९ ठाकुरबाणी रोडस्थित भित्री पक्कीसडक खण्डमा मोटरसाइकल दुर्घटना हुँदा एक पुरुष गम्भीर घाइते भएका छन् ।
ठाकुरबाणी रोडबाट घोघापुलतर्फ जाँदै गरेको प्र २-०१-००१ प ४११५ नम्बरको मोटरसाइकल अनियन्त्रित भई सडक छेउमा रहेको बिजुलीको पोलमा ठोक्किएको थियो ।
मध्यराति १२ः५ बजेतिर भएको उक्त दुर्घटनामा मोटरसाइकल चालक अन्दाजी २५ वर्षीय एक पुरुष गम्भीर घाइते भएका छन् ।
उनको टाउकोमा गम्भीर चोट लागेको र बोल्न नसक्ने अवस्थामा उपचारका लागि विराट नर्सिङ होम अस्पताल विराटनगर लगिएको छ ।
घाइतेको तत्काल नाम, थर र वतन खुल्न सकेको छैन । दुर्घटनाग्रस्त मोटरसाइकल वडा प्रहरी कार्यालय विराटनगरको नियन्त्रणमा रहेको छ ।
प्रहरीका अनुसार दुर्घटनास्थल जिल्ला ट्राफिक प्रहरी कार्यालय मोरङबाट अन्दाजी ६ किलोमिटर दक्षिण-पूर्वमा पर्दछ ।
प्रारम्भिक अनुसन्धानअनुसार अत्यधिक गतिका कारण दुर्घटना भएको हुनसक्ने देखिएको छ । चालकको मदिरा सेवन जाँच तत्काल गर्न नसकिएको प्रहरीले जनाएको छ ।
ट्राफिक प्रहरी कार्यालय मोरङले दुर्घटनाबारे थप अनुसन्धान गरिरहेको छ ।
