विराटनगर । विराटनगर महानगरपालिका-३ स्थित हेरिटेज मन्टेश्वरीले एक दिने स्पोर्ट्स मिट आयोजना गरी विद्यार्थीहरूको खेल प्रतिभा प्रदर्शन गरेको छ ।
विद्यालयले दौड, चेयर पुलिङ, बल पासिङ, स्पुन गेम लगायत विभिन्न खेलकुद प्रतियोगिताहरूको आयोजना गरेको थियो ।
प्रतियोगितामा विद्यालयका सबै विद्यार्थीहरूको अनिवार्य सहभागिता रहेको थियो ।
मन्टेश्वरीले विभिन्न प्रतियोगितामा विजयी हुने विद्यार्थीहरूलाई मेडल र प्रमाणपत्रसहित पुरस्कृत गरेको छ । साथै, प्रतियोगितामा सहभागिता जनाउने सबै विद्यार्थीहरूलाई पनि पुरस्कार प्रदान गरिएको छ ।
यस्ता खेलकुद कार्यक्रमहरूले विद्यार्थीहरूको व्यक्तित्व विकासमा महत्त्वपूर्ण भूमिका खेल्ने हेरिटेज मन्टेश्वरीका संस्थापक प्रिन्सिपल ज्योतिप्रसाद धितालले बताए ।
खेलकुदले बालबालिकाहरूमा टिमवर्क, आत्मविश्वास, अनुशासन र स्वस्थ प्रतिस्पर्धाको भावना विकास गर्न मद्दत गर्ने उनको भनाइ छ ।
“शारीरिक विकासको साथसाथै मानसिक विकासमा पनि खेलकुदको महत्वपूर्ण योगदान हुन्छ,” धितालले भने, “हामी बालबालिकाहरूलाई खेलको माध्यमबाट जीवनका महत्वपूर्ण सीपहरू सिकाउन चाहन्छौं ।”
विद्यालयले आगामी दिनमा पनि यस्ता खेलकुद कार्यक्रमहरू निरन्तर आयोजना गर्ने जनाएको छ ।
स्पोर्ट्स मिटका साथै मन्टेश्वरीले होली विशेष कार्यक्रम पनि आयोजना गरेको छ । कार्यक्रममा शिक्षिकाहरूले बालबालिकालाई अबिर लगाएर रंगीचंगी वातावरणमा नाचगान गर्दै होली पर्वको उत्सव मनाएका थिए ।
बालबालिकाहरूले होलीको महत्व र सांस्कृतिक पक्षबारे जानकारी पाउनुका साथै आपसी सद्भाव र मिलापको सन्देश बोकेको यस पर्वलाई हर्षोल्लासका साथ मनाएका थिए ।
यस प्रतियोगितामा अभिभावकहरूको पनि उल्लेखनीय उपस्थिति रहेको थियो ।
तीन वर्षअघि विराटनगर -३ पोखरियास्थित (सेल्फी रोड) मा स्थापना भएको हेरिटेज मन्टेश्वरीले विशिष्ट शैक्षिक सुविधाहरूसहित गुणस्तरीय शिक्षा प्रदान गरिरहेको छ ।
विद्यालयले कक्षामा सीमित विद्यार्थी संख्या, मितव्ययी शुल्क, एक हप्ताको निःशुल्क परीक्षण अवधि जस्ता विशेषताहरू प्रदान गर्दै आएको छ ।
यसका साथै, मन्टेश्वरीमा तालिम प्राप्त अनुभवी शिक्षकहरू, श्रव्य-दृश्य कक्षाकोठा, हेरचाह गर्ने शिक्षक तथा हेरचाहकर्ताहरू र विशाल खेल मैदानको व्यवस्था रहेको छ ।
