विराटनगर । नेपाल–भारत सीमावर्ती क्षेत्रमा सशस्त्र प्रहरी बल र भन्सार कर्मचारीकै सेटिङमा तस्करी मौलाएर गएको पाइएको छ ।
सीमामा परिचालित सशस्त्र प्रहरी बल र भन्सार कर्मचारीकै सेटिङ र समन्वयमा व्यापक रूपमा तस्करी हुने क्रम बढ्दै गएको गुनासो बढिरहेका बेला नेपाल प्रहरीको गस्ती टोलीले बिराटनगरबाट ठूलो परिमाणको अबैध सामान बरामद गरेको छ ।
नेपाल प्रहरीको टोलीले भन्सार छलेर नेपाल भित्र्याइएको करिब ४५ लाख रुपैयाँ बराबरको इलेक्ट्रोनिक्स सामग्री, फुड सप्लिमेन्ट, कस्मेटिक्स र मेडिकल सामग्रीसहित भारतीय ट्रक नियन्त्रणमा लिएको छ ।
पक्राउ परेको ट्रक भारतीय नम्बर यूपी ८७ ९१८१ रहेको छ भने चालक भारतका ३५ वर्षीय मोहम्मद अस्लाम रहेका छन् ।
इलाका प्रहरी कार्यालय रानीका प्रहरी निरीक्षक प्रकाश थापाको कमाण्डमा गएको प्रहरी टोलीले ट्रकलाई विराटनगर १८ मा रोकी जाँच गर्दा ठूलो परिमाणमा भन्सार छलिएका सामान फेला परेको हो ।
प्रहरीले ट्रकसहित नियन्त्रणमा लिएको सामग्रीलाई राजस्व अनुसन्धान कार्यालय, इटहरीमा बुझाएको छ ।
राजस्व अनुसन्धान कार्यालयका प्रमुख अनुसन्धान अधिकृत उत्तम घिमिरेका अनुसार सो ट्रकमा उच्च मूल्यका सामान रहेका छन् ।
ती सामानलाई भन्सार छली केवल १३ लाख ८१ हजार रुपैयाँ कर तिरेर नेपाल भित्र्याइएको प्रारम्भिक अनुसन्धानले देखाएको छ ।
स्रोतका अनुसार सीमावर्ती क्षेत्रमा भन्सार कर्मचारी र सशस्त्र प्रहरी बलकै मिलेमतोमा न्यून मूल्यांकन र कम भन्सार शुल्क तिरेर तस्करीका सामान नेपाल भित्र्याउने गिरोह सक्रिय रहेको छ ।
केही समयअघि बीपी कोइराला स्वास्थ्य विज्ञान प्रतिष्ठानका चिकित्सक अरविन्द्र यादवले भारतबाट भन्सार छल्दै ल्याएका मेडिकल उपकरणसमेत प्रहरीले नियन्त्रणमा लिएको थियो ।
यादवले सशस्त्र प्रहरी बलको सेटिङमा झण्डै २ लाख ६ हजार रुपैयाँ मूल्य बराबरका मेडिकल उपकरण भन्सार नतिरी ल्याएका थिए । उनलाई पक्राउ गरी अनुसन्धानपछि धरौटीमा छोडिएको थियो ।
सिमावर्ती क्षेत्रबाट कपडा, चिनी, जिरा, तेल, काजु, किसमिस लगायतका दैनिक उपभोग्य सामग्री भन्सार छल्दै नेपाल भित्र्याउने क्रम बढिरहेका बेला नेपाल प्रहरी र राजस्व अनुसन्धान कार्यालयको संयुक्त टोलीले गस्ती र निगरानी कडा बनाएको छ ।
राजस्व अनुसन्धान कार्यालयका प्रमुख अनुसन्धान अधिकृत घिमिरेका अनुसार जोगबनी तथा आसपासका नाकाबाट भन्सार छल्ने गिरोह सक्रिय रहेको सूचनाका आधारमा रात्री गस्तीसमेत सुरु गरिएको छ ।
सरकारले तस्करी नियन्त्रणका लागि कडाइ गरेको दाबी गरे पनि भन्सार कर्मचारी र सीमामा खटिएका सुरक्षाकर्मीहरूकै मिलेमतोमा तस्करी मौलाएको स्पष्ट देखिदै आएको छ ।
अब यसतर्फ सीमा सुरक्षाका साथै राजश्व चुहावट नियन्त्रणका लागि सीमावर्ती क्षेत्रमा परिचालित सशस्त्र प्रहरी बलको माथिल्लो निकाय र भन्सार कार्यालयभन्दा माथिल्लो तहलगायत सरोकारवाला पक्षले थप सक्रियता देखाउन जरुरी छ ।
