विराटनगर । विराटनगर महानगरपालिका–१ की सहेजादी खातुन आफ्ना २२ वर्षीय छोरा सलिम खानलाई लिएर कोशी अस्पताल आइन् । गत शनिबार साँझ मोटरसाइकल अनियन्त्रित भई दुर्घटनामा परेका सलिमको दाहिने खुट्टा भाँचिएको थियो ।
लगत्तै सलिमलाई लिएर कोशी अस्पताल आइपुगेकी सहेजादीले इमरजेन्सीमा छोरालाई भर्ना गर्न खोजिन् । तर, त्यहाँका स्वास्थ्यकर्मीले डाक्टर अपरेसन गर्न बाहिर गएको बताउँदै तत्काल भर्ना गरिदिएनन् ।
‘डाक्टर बाहिर हुनुहुन्छ, आउँदै हुनुहुन्छ भनेर चार घण्टा बिताइदिए उनीहरूले,’ सहेजादी भन्छिन्, ‘धन्न मेरा अरू आफन्तले गिरी फाउन्डेसनका मान्छेलाई बोलाइदिए । उहाँहरू आइसकेपछि भने भर्ना गरेर घाउ सफा गरी अर्थो वार्डमा पठाइदिए ।’
शनिबारदेखि नै अर्थो वार्डको बेड नम्बर २७१ मा रहेका सलिमको थप उपचार भएको छैन । झन्डै एक साता बितिसक्दा पनि सामान्य औषधिमात्र सेवन गरिरहेका छन्, सलिमले । सलिमकी वृद्ध उमेरकी आमाले छोराको उपचार प्रक्रिया अगाडि बढ्न नसक्नुको कारणबारे सोधपुछ गरिरहन्थिन् ।
यसबीचमा ‘राउन्ड’ मा आएका डाक्टरद्वय मिलन केसी र रोशन यादवसँग सहेजादीले शुक्रबार छोराको स्वास्थ्यबारे जानकारी लिन खोजिन् । छोराको अपरेसन कहिले हुन्छ डाक्टर’साप ? भन्ने उनको प्रश्नमा डाक्टरहरूको जबाफ थियो, ‘भगवान् भरोसा !’
बिरामीकै नजिक उनीहरूका आफन्तसँग डाक्टरहरूको बोल्नेशैली देखेर अवाक बनेकी सहेजादीले शुक्रबार नै अस्पतालकी मेडिकल सुपरीटेन्डेन्टसँग भेट्न खोजिन् ।
एक त छोराको उपचार प्रक्रियाबारे डाक्टरले बुझ्नेगरी परामर्श नदिनु अनि सोध्दा भगवान् भरोसाजस्तो निराशाजनक जबाफ दिएकोमा उनको चित्त दुखाई थियो ।
तत्काल उनले गिरी फाउन्डेसनका उपाध्यक्ष सोनु अल्हुसैनीलाई फोन गरिन् र अस्पताल आउन भनिन् । फाउन्डेसनको टोली र बिरामीका आफन्तले शुक्रबार दिउँसो नै मेसु डा. रुणा झासँग एक घण्टासम्म छलफल गरेको थियो ।
डाक्टरले बिरामीका आफन्तसँग बोल्ने शैली सुधार्नुपर्ने मात्र नभएर आफ्नो छोराको उपचार प्रक्रियाबारे सहेजादीले जानकारी लिन खोजिन् ।
जसक्रममा मेसु डा. झाले फाउन्डेसनबाट यसबारे लिखित गुनासो आएमा डाक्टरहरूलाई स्पष्टीकरण सोध्ने प्रतिबद्धता जनाएकी छन् ।
‘मैले पटक–पटक अनुगमन गरेकी छु । यस्ता गुनासा आइरहेका पनि छन्,’ उनले भनिन्, ‘डाक्टर र बिरामीका आफन्तबीचमा कम्युनिकेसन ग्याप हुन सक्छ । तर पनि म यसबारे डाक्टरहरूसँग सोधपुछ गर्नेछु । त्यहाँबाट गुनासाहरू लिखित आएमा स्पष्टीकरणसम्म सोध्छु । यहाँभन्दा धेरै कारबाही गर्नसक्ने अधिकार हामीसँग छैन ।’
अब, मेडिकल प्रोसिजरअनुसार सलिमको उपचार हुने पनि मेसु डा. झाको भनाइ छ । उनले तत्काल अर्थो विभाग प्रमुख डाक्टर महेन्द्र महतोसँग घटनाबारे जानकारी लिएकी थिइन् ।
जसमा डा. महतोले घाउमा सोइलिङ भइरहेका कारण अपरेसन गर्न नसकिएको बताउँदै भने, ‘डाक्टरहरू र बिरामीका आफन्तबीचमा कुराकानी हुँदा म थिइनँ । तर, उहाँको घाउ सोइलिङ भइरहेका कारण उपचार प्रक्रिया अगाडि बढ्न नसकेको हो । अवस्था हेरेर उपचार थाल्छौं ।
शिक्षा–स्वास्थ्य क्षेत्र सुधारका लागि खटिइरेको गिरी फाउन्डेसनका उपाध्यक्ष सोनु भन्छन्, ‘बिरामीकै अगाडि डाक्टरहरूले यस्तो जबाफ दिनु ठिक होइन । यदि, उनीहरूलाई एन्जाइटीजस्ता स्वास्थ्य समस्या थिए भने अवस्था छन् बिग्रन्थ्यो ।’
अर्थो वार्डमा रहेका सबै बिरामीहरू डाक्टरहरूको बोल्ने शैली र उपचारमा हुने ढिलाइका कारण असन्तुष्ट छन् । यसै गुनासालाई लिएर आफूहरू सरोकारवाला निकायसमक्ष पुग्ने उपाध्यक्ष गिरीको भनाइ छ ।
नेपालकै जेठो र पूर्वकै ठुलो हस्पिटल कोशी अस्पतालमा बेथितिका चाङ छन् ।
केही महिनाअघि मात्र त्यहाँ कार्यरत डाक्टरले कमिसनको लोभमा बिरामीलाई उपचारका लागि निजी अस्पतालमा पठाएको भन्दै असन्तुष्ट बिरामीका आफन्तले मेसु डा. झासँग छलफल गरेका थिए ।
