विराटनगर । मोरङको रतुवामाई नगरपालिकामा शनिबार साँझ भएको दुर्घटनामा परी एक जना गम्भीर घाइते बनेका छन् ।
शनिबार साँझ ६:५५ बजेतिर रतुवामाई-४ कठघराचोकमा प्र १-०२-०५० प ३५५५ नम्बरको मोटरसाइकलले साइकलयात्रीलाई ठक्कर दिएको थियो ।
हुलाकी पक्की सडकखण्डमा रंगेलीबाट आमबारीतर्फ आउँदै गरेको मोटरसाइकलले सोही दिशातर्फ जाँदै गरेका साइकलयात्री रतुवामाई-४ कठघरा बस्ने ४२ वर्षीय देवराज गिरी घाइते भएका थिए ।
दाहिने हात, छाती र खुट्टामा चोट लागेका उनको अवस्था गम्भीर छ ।
दुर्घटनामा मोटरसाइकल चालक सुनसरीको देवानगन्ज गाउँपालिका-७ बस्ने २९ वर्षीय गिरिजाप्रसाद यादव घाइते भएका छन् ।
वडा प्रहरी कार्यालय झापा दरबन्दी भई सोही कार्यालयमा कार्यरत रहेका यादव घर बिदा बसेका थिए । उनको घुडाँ र ओठमा चोट लागेको छ ।
दुवै जनालाई उपचारको लागि कोशी अस्पताल विराटनगरमा उपचार भइरहेको छ ।
मोटरसाइकल र साइकल भने प्रहरी चौकी झुर्कियाले नियन्त्रणमा लिएको छ ।
सवारी चालक अनुमतिपत्र साथमा नभएका प्रहरी जवान यादवले तीव्र गतिमा मोटरसाइकल हुइँक्याउँदा दुर्घटना भएको प्रहरीको प्रारम्भिक अनुसन्धानमा उल्लेख छ ।
