काठमाडौं । सुनसरीको धरान उपमहानगरपालिकाका मेयर हर्कराज राई (हर्क साम्पाङ) रित्तो गाग्री लिएर संघीय राजधानी काठमाडौं यात्रामा छन् ।
सोमबार (हिजो) विराटनगर विमानस्थल हुँदै काठमाडौं पुगेका हर्कले मंगलबार सिंहदरबार पुगेर खानेपानीमन्त्री प्रदीप यादव र अर्थमन्त्री विष्णु पौडेलसँग भेट गरेका थिए ।
आजै उनले प्रधानमन्त्री केपी शर्मा ओलीलाई पनि भेटेर अर्को पत्र बुझाउने बताएका थिए । तर, साम्पाङले ओलीसँग मंगलबार सिंहदरबारमा भेट्न पाएनन् ।
प्रधानमन्त्री सचिवालय स्रोतका अनुसार प्रधानमन्त्री ओलीको आज मेयर सम्पाङसँग भेटघाटको कार्यक्रम नै तय भएको थिएन ।
प्रधानमन्त्रीको आज बिहानैदेखि भेटघाटको कार्यक्रम सेड्युड टाइट भएका कारण पनि भेट हुन नसकेको सचिवालयले जनाएको छ ।
यसअघि खानेपानीमन्त्री यादव र अर्थमन्त्री पौडेलसँग भेट गरेका उनले आफ्ना समस्या राखेका थिए । जसमा अर्थ र खानेपानीबाट सकारात्मक कुरा आएको कुरा हर्कले सञ्चारकर्मीलाई बताएका थिए ।
मेयर साम्पाङले बोकेर गएको रित्तो गाग्रो गेटबाटै प्रहरीले खोसेको थियो । जसबारे मेयर साम्पाङले गृह मन्त्रालयको विषय भएकाले धेरै नबोल्ने प्रतिक्रिया दिए ।
तर आफू पानीको मुद्दालाई राजनीतिक नभइ विकास माग्न आएको बताएका छन् ।
