विराटनगर । कोरोना महामारीपछिको आर्थिक मन्दीको सामना नेपालले पनि गरिरहेको छ ।
आम्दानी खुम्चिएका कारण मन्दीबाट उक्सिन हरेक व्यक्तिले उत्तिकै संघर्ष गरिरहेको छ ।
यो परिस्थिति सायद सबैले बुझेको हुनुपर्छ । तर, विराटनगरको जेम्स इन्टरनेसनल स्कुलले भने आधा शुल्क तिर्न नसकेका विद्यार्थीहरूलाई असमान व्यवहार गरेको पाइएको छ ।
‘फी’ नतिर्दा विद्यालयले अभिाभावकसँग ताकेता गनपर्ने हो । तर, पूर्ण शैक्षिक शुल्कमध्येबाट आधाजति रकम तिर्न नसकेका विद्यार्थीहरूलाई विद्यालयले परीक्षा दिनबाट बञ्चित गरेको हो ।
त्रैमासिक परीक्षा चलिरहँदा आधा ‘फी’ मात्र बुझाएका विद्यार्थीलाई बुधबारको जाँचमा सहभागी हुन नदिइएको अभिाभावकको आरोप छ ।
बिहीबार बिहान आफ्ना सन्तानले जाँच दिने व्यवस्था मिलाइदिन भन्दै अभिभावक पुगेपछि पनि विद्यालयले आधा शुल्क बुझाउन बाँकी रहेका चार जना विद्यार्थीलाई छुट्टै राखेर जाँच लिएको थियो ।
कक्षामा एकसाथ बस्ने सबैले अर्को हलमा परीक्षा दिँदा केही रकम तिर्न बाँकी भएकाहरूले भने एउटा कुनामा पसेर जाँच दिइनुपर्ने बाध्यता बनेको हो ।
‘अरू विद्यार्थीहरूले हलमा बसेर जाँच दिइरहँदा मेरा छोराछोरीले एउटा कुनामा पसेर परीक्षा दिइरहेका छन्,’ अभिभावक लक्ष्मी कामत भन्छिन्, ‘हिजो पनि बाहिर आधा घण्टा उभ्याइएछ । हामी आएर लग्यौं । आज पनि यति धेरै अपमान गरिएको छ ।’
यसैगरी अर्का अभिभावक जयकान्त कामतले चैतसम्म शुल्क तिर्छु भन्दा पनि आफ्ना सन्तानलाई परीक्षा दिन नदिइएको दुःखेसो गरे ।
विराटनगर महानगरपालिका–१ पोखरियाको उक्त स्कुलमा बिहीबार सञ्चालक समिति, प्रिन्सिपल, व्यवस्थापक र अभिभावक यसै विषयलाई लिएर छलफलमा बसेका थिए ।
छलफलका क्रममा अभिभावकहरूले कक्षा संचालन नहुँदा पनि पूर्ण रूपमा शुल्क बुझाएको स्कुल प्रशासनलाई स्मरण गराएका थिए ।
अहिले पनि चैतसम्म अलिअलि गर्दै शुल्क बुझाउने प्रतिबद्धता जनाउँदा पनि स्कुल प्रशासनले टेरेन ।
फि जसरी भए पनि तिर्नैपर्ने भन्दै स्कुल प्रशासनले अडान कस्यो भने विस्तारै शुल्क तिर्न सक्छु भन्ने अभिभावकहरू फन्किएर घरतर्फ लाग्यो, जसकारण छलफल सहमतिमा पुग्न सकेन ।
‘स्कुल प्रशासनले अटेर गर्यो । अभिभावकले फि तिर्न सकेनन् भने उनीहरूलाई नै भन्ने हो । जतिसक्दो मिलाइदिने हो । किनकि, कोरोना महामारीका बेला पनि अभिभावकले सहयोग गरेकै हुन् । अहिले थोरै समय त दिनुपर्यो नि !,’ युवा नेता अभिषेक भट्टराई भन्छन् ।
यता, विद्यालय प्रशासनले भने विद्यार्थीका अभिभाकलाई शुल्क बुझाउन ताकेदा गर्दा उल्टै स्कुल आएर बच्चा लिएर गएको प्रत्यारोप लगाएको छ ।
शुल्क बुझाउन नसकेका विद्यार्थीलाई जाँचका लागि अस्थायी कागज बनाएर परीक्षा दिलाएको विद्यालयका व्यवस्थापक पंकज साहको दाबी छ ।
परीक्षा नजिक हुँदै गरेको अवस्थामा पनि शुल्क बुझाउने प्रक्रिया अनियमित हुँदा विद्यालयलाई सास्ती पर्ने भएकाले ‘फी’ बुझाउन ताकेता गर्न खोजिएको प्रिन्सिपलको भनाइ छ ।
समयमा शुल्क बुझाउन नसक्ने र पूर्ण रूपमा पनि बुझाउन नसक्ने विद्यार्थीमार्फत नै अभिभाकलाई ताकेता गरिएको प्रिन्सिपल पंकज खड्काले बताए ।
विगत ३० वर्षदेखि सञ्चालन हुँदै आएको उक्त विद्यालयमा पछिल्लो दुई वर्षअघि व्यवस्थापन समिति फेरिएको थियो ।
त्यसयता विद्यालय प्रशासनले आफूहरूलाई सास्ती दिइरहेको अभिभावकको दुःखेसो छ ।
बालकक्षादेखि १० सम्म कक्षा सञ्चालन हुँदै आएको उक्त स्कुलमा साढे पाँच सय विद्यार्थी अध्ययनरत छन् ।
