विराटनगर । नेकपा माओवादी केन्द्रका नमोनारायण माझी मोरङको ग्रामथान गाउँपालिका अध्यक्षमा निर्वाचित भएका छन् ।
आइतबार भएको उपनिर्वाचनअनुसार ५४ वर्षीय माझीले साविक विजेतासमेत रहेको नेपाली कांग्रेसका उम्मेदवारलाई एक हजार ६३६ मतान्तरले हराएका हुन् ।
गत महिनामात्र कांग्रेस छोडेर माओवादीमा प्रवेश गरेका माझीले ६९६९ मतसहितको जित हात पार्दै ग्रामथान गाउँपालिका अध्यक्ष बनेका हुन् ।
उनका निकटतम् प्रतिद्वन्दी कांग्रेसका बलराम सरदार थारूले ५३३३ मत ल्याए भने तेस्रो स्थानमा रहेका नेकपा एमालेका उम्मेदवार तुलसीराम विश्वासले ४१५९ मत पाए ।
ग्रामथानका नवनिर्वाचित अध्यक्ष माझीले ग्रामथानबासीका अपेक्षा पूरा गर्ने प्रतिबद्धता जनाएका छन् ।
शब्द एक्सप्रेससँग सोमबार संक्षिप्त प्रतिक्रिया दिँदै माझीले चुनावका क्रममा आफूले गरेका बाचाहरू पूरा गर्ने प्रतिबद्धता जनाएका हुन् ।
‘मैले चुनावी प्रचारप्रसारका क्रममा जनतासामु फेहरिस्त पारेका एजेन्डाहरू क्रमैसँग पूरा गर्नेछु,’ उनले भने, ‘जुन अपेक्षा राखेर ग्रामथानबासीले मलाई मत दिनुभएको छ । त्यसलाई पूरा गर्ने जिम्मेवारी मेरो काँधमा आएको छ ।’
३० वैशाख २०७९ मा भएको चुनावमा निर्वाचित कांग्रेसका जयप्रकाश गच्छदारको मृत्यु भएपछि ग्रामथानमा उपनिर्वाचन भएको हो ।
जसमा कांग्रेस र एमालेसहित विभिन्न राजनीतिक दलका १४ र एक जना स्वतन्त्र १५ उम्मेदवारलाई माझीले उछिने ।
अब, अध्यक्ष बनिसकेपछि पालिकाका अनियन्त्रित बनेका संयन्त्रहरूलाई ट्र्याकमा ल्याउने बताएका छन् ।
‘ग्रामथानका संयन्त्रहरू अनियन्त्रित भएको मैले पाएको छु, ती संयन्त्रहरू आउट अफ ट्र्याक भएका छन्,’ उनले भने, ‘ती संयन्त्रलाई ट्र्याकमा ल्याउँछु । आमजनताले पाउनुपर्ने सेवाहरू र विकास निर्माणका कार्यहरूलाई प्राथमिकतामा राखेर अगाडि बढ्ने छु ।’
२०७४ सालको स्थानीय तह निर्वाचनमा तत्कालीन फोरम लोकतान्त्रिकबाट ग्रामथान–१ को वडाध्यक्षमा निर्वाचित भएका थिए ।
पछि फोरम र नेपाली कांग्रेस एकीकरण भएपछि उनी कांग्रेस बने ।
अघिल्लो स्थानीय तहको निर्वाचनमा पनि वडाध्यक्षको आकांक्षी रहेका उनलाई कांग्रेसले टिकट नदिएपछि स्वतन्त्र उम्मेदवार बनेका थिए ।
तर, त्यसबेला वडाध्यक्षमा हारेका माझीले कांग्रेस छोडर माओवादी प्रवेश गर्दै समग्र ग्रामथानको नेतृत्व गर्ने अवसर पाएका हुन् ।
