फाइल तस्बिर विराटनगर । मोरङको विराटनगर महानगरपालिकामा मोटरसाइकलको ठक्करबाट घोडाको मृत्यु भएको छ भने मोटरसाइकल चालक गम्भीर घाइते बनेका छन् ।
मंगलबार राति ९ः२० बजेतिर विराटनगर-३ एयरपोट मोडस्थित कोशी लोकमार्गमा विराटनगरबाट कन्चनबारीतर्फ जाँदै गरेको प्रदेश १-१-०१५ प ५९६२ नम्बरको मोटरसाइकलले घोडालाई ठक्कर दिएको थियो ।
मोटरसाइकलको ठक्करबाट घोडाको घटनास्थलमा नै मृत्यु भएको प्रहरीले जनाएको छ ।
दुर्घटनामा मोटरसाइकल चालक विराटनगर-३ बस्ने ३१ वर्षीय अमित झाको पेट, मुखमा, हातमा चोट लागेको छ ।
गम्भीर घाइते उनलाई उपचारका लागि नोबेल अस्पताल विराटनगरतर्फ पठाइएको प्रहरीले जानकारी दिएको छ ।
मृत्यृ भएको घोडा भने घोडाधनी विराटनगर-३ कै रविन कार्कीको जिम्मा लगाइएको छ ।
दुर्घटनामा परेको मोटरसाइकल प्रहरी चौकी बरगाछीको नियन्त्रणमा छ । मोटरसाइकल चालकसाँ सवारी चालक अनुमतिपत्र साथमा नभएको प्रहरीले जनाएको छ ।
चौपायको कारण दुर्घटना भएको प्रहरीको प्रारम्भिक निष्कर्ष छ ।
