विराटनगर । नेपालकी दीपा लामाले जर्मनीमा स्वर्ण पदक जितेकी छन् ।
जर्मनीको युएलएम सहरमा भएको एसयुडी गेम्स अन्तर्राष्ट्रिय कराते प्रतियोगितामा दीपाले स्वर्ण पदक जितेकी हुन् ।
एसयुडी गेम्स पावर्ड बाई एडिडास अन्तराष्ट्रिय कराते प्रतियोगिताअन्तर्गत २०२४ जुलाई ६ मा नेपालको लागि महिलातर्फ ६१ केजी तौल समूहमा उनले पहिलो स्वर्ण पदक दिलाएकी हुन् ।
क्वार्टरफाइनलमा गिस्सर इसाबेललाई ४-७ अंकले पराजित गरी सेमिफाइनलमा स्थान बनाएकी उनी अस्ट्रियाकी गस्तल वरोनिकालाई १-४ अंकले हराएर फाइनल प्रवेश गरेकी थिइन् ।
करातेका अन्तर्राष्ट्रिय प्रशिक्षक प्रभाकर राना मगरका अनुसार फाइनलमा उनले जर्मनीकी मोस्टर्ट मडेलिन आलिबियालाई ४-९ अंकको फराकिलो अन्तरले हराउँदै स्वर्ण पदक हासिल गरेकी हुन् ।
यसैगरी, ८४ केजीभन्दा माथिको तौल समूहमा नेपालका सुशील पौडेल पाँचौं बने ।
पहिलो फाइटमा भारतको अब्दुल्ला इलयास पटेललाई ०-८ अंकले पराजित गरेका सुशील जर्मनीका सेजफिक सेफोसँग ३-५ अंकले पराजित भएको अर्का अन्तराष्ट्रिय कराते प्रशिक्षक परशु कुँवरले जानकारी दिए ।
