विराटनगर । प्रारम्भिक बाल विकास (इसिडी) शिक्षा सुधारको माग गर्दै विराटनगर महानगरपालिकाको कार्यालयको गेटमा धर्ना दिइएको छ ।
बाबुराम भट्टराई नेतृत्वको नेपाल समाजवादी पार्टीको भ्रातृ संगठन नेपाल समाजवादी विद्यार्थी युनियन, कोशी प्रदेशले शुक्रबार महानगरकाे गेटमा उभिएर इसिडी शिक्षा सुधारको माग राख्दै धर्ना दिएको हो ।
शिक्षाको जग इसिडी सुधार र समानता (निजी मण्टेश्वरीमा चार तह, सरकारीमा एक तह) नभएकोले यसलाई समानता कायम गरी गुणस्तरीय बनाउनको लागि नेपाल समाजवादी विद्यार्थी युनियनले निरन्तर आन्दोलन गर्दै आएको छ ।
सोही अभियानअन्तर्गत आज महानगरपालिका अगाडि धर्ना दिइएको नेपाल समाजवादी विद्यार्थी युनियन, कोशी प्रदेशका संयोजक तरुण खवासले जानकारी दिए ।
विभिन्न पाँचबुँदे माग राखेर महानगरपालिकाअगाडि उभिएको बताउँदै उनले इसिडी शिक्षाको सुधारमा पहल गरिदिनका लागि शिक्षामन्त्री समेतलाई ध्यानाकर्षणपत्र बुझाउने आफूहरूको तयारी रहेको सुनाए ।
‘शिक्षा क्षेत्रको जनशक्ति विकास र समाज निर्माणको जगका रूपमा परिचित इसिडी शिक्षामा गम्भीर समस्या छन्,’ उनले भने, ‘इसिडीमा सरकारी र निजी शैक्षिक संस्थाबीचमा एक प्रकारको खाडल छ । त्यसलाई सुधार्नका लागि हामी यहाँ उभिएका हौं ।’
इसिडी शिक्षालाई न्यूनतम् तीन तह प्लेग्रुप, नर्सरी र किन्डरगार्डेनको व्यवस्था गर्न, अन्तर्राष्ट्रिय मापदण्डअनुसार शिक्षक र सहायक कर्मचारीको योग्यता र सुविधा बढाउन, बालमैत्री पूर्वाधार र सिकाइ सामग्रीहरू उपलब्ध गराउन, विद्यार्थी खाजा कार्यक्रममा सुधार गर्नु तथा शिक्षासम्बन्धी केन्द्र, प्रदेश र स्थानीय सरकारको दायित्व स्पष्ट पार्ने माग आफूहरूको रहेको खवासले बताए ।
नेपालको भावी शैक्षिक गुणस्तरको आधार बनाउन इसिडी शिक्षामा सरकारले गम्भीरता देखाउनुपर्ने उनीहरूको माग छ ।
युनियनले इसिडी शिक्षा राम्रो दिन नसके विद्यालय र विश्वविद्यालय शिक्षा पनि राम्रो बनाउन नसकिने बताउँदै आएको छ ।
सरकारले सामुदायिक विद्यालयमा सञ्चालनमा ल्याएको इसिडी एक तहको रहेको भए पनि निजी विद्यालयलाई चार तहको मान्यता दिने गरेको खवास बताउँछन् ।
इसिडी कम्तीमा तीन तहको बनाउन सरकारलाई समाजवादी विद्यार्थी युनियनको सुझाव छ ।
इसिडी शिक्षकहरूलाई बालमनोविज्ञान, केयरगिभर र मन्टेश्वरीसम्बन्धी तालीम दिन पनि सरकारसँग समाजवादी विद्यार्थीले माग गरेको छ ।
