विराटनगर । मोरङको विराटनगर महानगरपालिका–८ स्थित श्री सुशिक्षा निकुञ्ज आधारभूत विद्यालयले पठनपाठन थालेकै दिन विद्यार्थीलाई पाठ्यपुस्तक प्रदान गरेको छ ।
सोमबार विद्यालयका प्रधानाध्यापक, व्यवस्थापन समितिका पदाधिकारी र जनप्रतिनिधिले विद्यालयमा अध्ययनरत २९० जना विद्यार्थीलाई पाठ्यपुस्तक वितरण गरेका हुन् ।
विद्यालय व्यवस्थापन समितिका अध्यक्ष पिताम्बर दाहाल, विराटनगर–८ का वडाध्यक्ष रामकुमार पोखरेल, विद्यालयका प्रधानाध्यापक चक्रप्रसाद पोखरेल तथा शिक्षक–शिक्षिकाले विद्यार्थीलाई पुस्तक वितरण गर्दै शैक्षिक उन्नतीको शुभकामना दिएका थिए ।
प्रअ पोखरेलले यसपालि सामुदायिक विद्यालयहरूले समयमै पाठ्यपुस्तक पाएकोले पठनपाठन सुरु भएकै दिन कक्षा २ देखि ८ सम्मका विद्यार्थीलाई पुस्तक वितरण गर्न सफल भएको जानकारी दिए ।
‘आइतबारबाट स्कुल लागे पनि आज पुस्तक वितरण गरेर हामीले पठनपाठन थाल्यौं,’ उनले भने, ‘यसअघि शैक्षिक सत्र सकिँदासम्म किताब नपाउने बाध्यता थियो । शैक्षिकसत्र सकिने बेलासम्म पाठ्यपुस्तक नपाएपछि विद्यार्थीहरूले किताब नहेरी परीक्षा दिनुपर्थ्यो । तर, यसपालि कक्षा सुरु भएकै दिन उनीहरूले किताब पाए ।’
जनक शिक्षा सामाग्री केन्द्र कोशी प्रदेश कार्यालयले नयाँ शैक्षिकसत्रलाई मध्येनजर गरेर यसपालि चैत्र १३ गतेदेखि नै पाठ्यपुस्तकको बिक्री–वितरण थालेको थियो । सोहीअनुरूप सुशिक्षा निकुञ्जले पनि नयाँ शैक्षिकसत्र सुरु हुनुभन्दा तीन साताअघि नै पाठ्यपुस्तक पाएको थियो ।
प्रअ पोखरेलले विद्यार्थीले समयमै पुस्तक पाउँदा सामुदायिक विद्यालयको साख पुरानै अवस्थामा फर्काउन सहज हुने जनाए । शिक्षक, अभिभावकको समन्वयमा बर्सेनि सामुदायिक विद्यालयमा भर्नादर उकालो लागिरहेको उनको भनाइ छ ।
२०१३ मा स्थापना भएको सुशिक्षा निकुञ्ज आविमा २०६९ सालयता शिशु कक्षादेखि आठसम्म पठनपाठन हुँदै आएको छ । हाल ३७७ विद्यार्थी अध्ययनरत रहेका छन् भने यसको संख्या बढाउन विद्यालयले भर्ना अभियान चलाउँदै आएको छ ।
अतिरिक्त क्रियाकलाप र शैक्षिण गुणस्तरको विषयमा संस्थागत–निजी विद्यालयसँग टक्कर दिनेगरी काम गरिरहेको यस विद्यालयले अंग्रेजी माध्यमबाट पनि पठनपाठन गरिरहेको छ ।
