विराटनगर । विराटनगरको मेरिल्यान्ड कलेजको बसले मोरङको रंगेली नगरपालिकामा पैदलयात्री ठक्कर दिएको छ ।
मंगलबार साँझ ५ः४० बजेतिर रंगेली नगरपालिका-७ बसपार्कस्थित विराटनगर-रंगेली हुलाकी सडकखण्डमा मेरिल्यान्डको बसले पैदलयात्रीलाई ठक्कर दिएको हो ।
विराटनगरबाट रंगेलीतर्फ जाँदै गरेको को १ क १५२९ नम्बरको बसले सोही दिशाबाट जाँदै गरेको साइकलयात्रीलाई पछाडिबाट ठक्कर दिएको थियो ।
बसको ठक्करबाट साइकलयात्री रंगेली-३ रन्जनीका अन्दाजी ५० वर्षीय अर्जुनदेव भट्टराई गम्भीर घाइते भएको प्रहरीले जनाएको छ ।
इलाका प्रहरी कार्यालय, रंगेलीका अनुसार भट्टराईको बाँया आँखामुनि चोट, दुवै हातको पन्जा, हत्केलामा चोट र दाहिने खुट्टामा चोट लागेको छ ।
उनलाई उपचारको लागि गोल्डेन अस्पताल, विराटनगर ल्याइएको छ ।
दुर्घटनापछि फरार बनेका बस चालक रतुवामाई नगरपालिका-५ सिजुवाका ४२ वर्षीय सूर्यलाल ताजपुरिया प्रहरीले पक्राउ गरेको थियो ।
उनलाई साँझ ७ः३० बजेतिर इलाका प्रहरी रंगेलीबाट खटिएको प्रहरी टोलीले नियन्त्रणमा लिएको हो ।
मेरिल्यान्डको बस भने इलाका प्रहरी कार्यालय, रंगेलीको नियन्त्रणमा रहेको छ ।
तीव्र गतिमा रहेको बसले दुर्घटना गराएको प्रहरीको प्रारम्भिक अनुसन्धानामा खुलेको छ ।
