विराटनगर । मोरङको विराटनगर महानगरपालिका-१० तीनटोलियास्थित अर्किड पब्लिक स्कुलले वार्षिकोत्सव मनाएको छ ।
शनिबार स्कुल परिसरमा विभिन्न कार्यक्रम आयोजना गरी अर्किडले आफ्नो वार्षिकोत्सव मनाएको हो ।
कार्यक्रममा स्कुलमा अध्ययनरत विद्यार्थी तथा शिक्षकले आकर्षक नृत्य प्रस्तुत गरेका थिए ।
त्यसबाहेक गायन, नाटक र फेसन सो प्रस्तुत गरी उनीहरूले अभिभावक र अतिथिहरूलाई रमाइलो प्रदान गरेको स्कुलका प्रिन्सिपल सिएम श्रेष्ठले जानकारी दिए ।
कार्यक्रममा बोल्ने क्रममा प्याब्सन मोरङका अध्यक्ष प्रेमलालसिंह सुवालले निजी विद्यालयहरूले गुणस्तरीय शिक्षा र रोजगारमुखी शिक्षा प्रदान गरेर दक्ष जनशक्ति उत्पादन गरी राष्ट्र निर्माणमा ठुलो योगदान पुर्याएको बताए ।
यस्तै, अर्किड कलेजका प्रिन्सिपल दिपेश बाँस्तोलाले अभिभावकको सहयोग शिक्षक र विद्यार्थीहरूको मेहनतको कारणले स्कुलले सफलता प्राप्त गरेको बताए ।
अर्किड स्कुलका प्रिन्सिपल श्रेष्ठले विद्यार्थीहरूलाई गुणस्तरीय शिक्षासँगै प्रविधियुक्त, सीपमुलक र नैतिक शिक्षा प्रदान गरेर अगाडि बढेको बताए ।
कार्यक्रममा विराटनगर-१० का वडाअध्यक्ष अर्जुन गिरी, विभिन्न विद्यालयका प्रिन्सिपल, शिक्षक, अभिभावकहरूको उपस्थिति थियो ।
