विराटनगर । कार्यसम्पादन मूल्यांकनमा विराटनगर महानगरपालिका चौथोमा सीमित बनेको छ ।
राष्ट्रिय प्राकृतिक स्रोत तथा वित्त आयोगले सार्वजनिक गरेको नतिजामा देशभरिका अन्य ६ महानगरपालिकामध्ये विराटगर चौथो बनेको हो ।
आयोगका अनुसार विराटनगर महानगरपालिकाले ३२ दशमलव ८५ प्रतिशत अंक प्राप्त गरेको हो ।
आयोगले आगामी आव २०८१-८२ मा सङ्घीय सरकारबाट प्रदेश र स्थानीय तहलाई प्रदान गर्ने वित्तीय समानीकरण अनुदानको प्रयोजनका लागि विभिन्न १७ वटा सूचकमा उल्लेखित अंक भारको आधारमा मूल्यांकन गर्ने गर्द छ ।
पालिकाले गरेको खर्च, बेरुजु, लेखा परीक्षणले औंल्याएको बेरुजु, स्थानीय सञ्चित कोष व्यवस्था प्रणालीको प्रयोग, आवधिक योजना गरे नगरेको, राजस्वको विभाजन गरे नगरेको लगायतका सूचकमा मूल्यांकन गर्ने गर्दछ ।
समय सीमाभित्र बजेट ल्याए-नल्याएको, बजेट पास गरे-नगरेको, घरजग्गा रजिस्ट्रेसन शुल्क, मनोरञ्जन कर तथा विज्ञापन कर बापत उठेको रकममध्ये ४० प्रतिशत प्रदेश सरकारलाई मासिक रूपमा दिए नदिएको लगायतका आधारमा अनलाइन पोर्टल बाट अपलोड गरी सोही आधारमा अंक प्राप्त गर्ने प्रावधान छ ।
कार्यसम्पादन मूल्यांकनमा भरतपुर महानगरपालिका उत्कृष्ट पालिका घोषित भएको छ । गत आर्थिक वर्ष २०७९-०८० मा आयोगको मूल्यांकनमा भरतपुर महानगर नै पहिलो भएको थियो ।
आयोगले दिएको जानकारीअनुसार भरतपुर महानगरपालिकाले यस पटक ५६ दशमलव २९ प्रतिशत अङ्क प्राप्त गरेको छ । जबकि काठमाडौँ महानगरपालिकाले ३९ दशमलव ०२, वीरगन्ज महानगरपालिकाले ३३ दशमलव ४९, ललितपुर महानगरपालिकाले २५ दशमलव १८ र पोखरा महानगरपालिकाले २० दशमलव ७४ प्रतिशत अंक पाएका छन् ।
