विराटनगर । समाजसेवी अभिषेक गिरीले स्थापना गरेको गिरी फाउन्डेसनले नेपाली कांग्रेसका अग्रज नेता-कार्यकर्तालाई सम्मान गरेको छ ।
शनिबार विराटनगर महानगरपालिका-८ मधुमारास्थित अष्ट चीरन्जीवी मन्दिरको सभाहलमा एक कार्यक्रम आयोजना गरी फाउन्डेसनले कांग्रेसका पुराना नेताहरूलाई सम्मान गरेको हो ।
कोशी प्रदेशसभा सदस्य अमृत अर्याल र फाउन्डेसनका अध्यक्ष अभिषेक गिरीले विराटनगर-८ का ७५ जना नेता कार्यकर्तालाई प्रमाणपत्रसहित सम्मान गरे ।
पार्टीका लागि दिएको अतुलनीय योगदानको कदर गर्दै अग्रज नेता-कार्यकर्तालाई सम्मान गरिएको फाउन्डेसनका अध्यक्ष गिरीले बताए ।
कांग्रेस पार्टीमार्फत देशको आर्थिक र सामाजिक विकासमा अहम् भूमिका निभाएका नेता कार्यकर्तालाई सम्मान गर्न पाउँदा हर्ष महसुस गरेको उनको भनाइ छ ।
कार्यक्रमलाई सम्बोधन गर्नेक्रमा कोशी प्रदेश सांसद तथा कांग्रेसका केन्द्रीय सदस्य अमृत अर्यालले गिरी फाउन्डेसनले नेता सम्मान गर्ने कार्यको थालनी गरेकोमा अध्यक्ष गिरिको प्रशंसा गरे । कांग्रेसलाई एक हुन यस्ता कार्यक्रमले सहयोग प्रदान गर्नेमा आफू विश्वस्त रहेको अर्यालले बताए ।
कार्यक्रममा बोल्दै मोरङ क्षेत्र नम्बर ४ ‘ख’ का सभापति सुवोध निरौला, समाजसेवी केदार घिमिरे, विनायक पन्तलगायतले गिरिले समाजसेवामा सक्रियता देखाएकोमा खुसी व्यक्त गरे ।
कांग्रेसलाई कांग्रेस बनाउन आफ्नो ऊर्जाशील उमेर खर्चिँदा पनि ओझेलमा पारिएका कार्यकर्तालाई सम्मान गरेर एउटा उदाहरणीय काम गरेको भन्दै कार्यक्रक्रमका वक्ताहरूले गिरी फाउन्डेसनको चर्चा गरे ।
