विराटनगर । मोरङको विराटनगर महानगरपालिका–५ स्थित बरगाछी चोकमा ट्रकको ठक्करबाट एक जनाको मृत्यु भएको छ ।
आइतबार बिहान ९ः५० बजेतिर कोशी राजमार्गअन्तर्गत बरगाछीमा ट्रकले स्कुटरलाई ठक्कर दिएको थियो ।
कञ्चनबारीबाट विराटनगरतर्फ आउँदै गरेको बा प्र ३–००१ ख १४११ नम्बरको ट्रकले लाइफ गार्डबाट पानीट्याङ्कीतर्फ बाटो क्रस गर्दै गरेको को ३६ प २८८९ नम्बरको मोसालाई ठक्कर दिएको थियो ।
ट्रकको ठक्करबाट स्कुटर चालक सुनसरीको दुहबी नगरपालिका–९ का अन्दाजी २५ वर्षीय नगेनकुमार चौधरी गम्भीर घाइते भएका थिए ।
घाइते उनलाई उपचारको लागि कोशी अस्पताल, विराटनगर पठाइएकोमा डाक्टरले चेकजाच गर्दा मृत घोषणा गरेका थिए ।
चौधरी इलाका प्रशासन कार्यालय रंगेलीका कम्प्युटर अधिकृत रहेको बताइएको छ ।
सोही स्कुटरमा पछाडि सवार दुहबी–९ की अन्दाजी १६ वर्षीय स्वस्था चौधरी घाइते बनेकी छन् ।
स्वस्था मृतक नगेनकी भतिजी रहेको प्रहरीले जनाएको छ । मोरङ प्रहरी प्रमुख एसपी दीपक पोखरेलका अनुसार स्वस्थाको दुवै घुँडामा सामान्य चोट लागेको छ ।
दुर्घटनापछि स्थानीय ५०–६० जनाको संख्यामा भेला भई ट्रकमा आगजनी गरेका थिए । आक्रोशित भिडले ट्रकको अगाडिको भागमा आगजानी गरेका हुन् ।
नेपाल प्रहरी र दमकलको सहायतामा आगो नियन्त्रणमा आएको छ । ट्रकको अगाडिको भाग जलेर सामान्य क्षति भएको र ट्रक घटनास्थलबाट हटाउने पहल भइरहेको एसपी पोखरेलले जानकारी दिए ।
वडा प्रहरी कार्यालय, विराटनगरबाट प्रहरी नायब उपरीक्ष विजय श्रेष्ठको टोलीले अनुसन्धान थालेको छ । प्रहरीले ट्रकमा आगजनी गर्ने विराटनगर–५ बरगाछी का १७ वर्षीय राजु राजवंशी र विराटनगर–४ का प्रल्हाद रायलाई नियन्त्रणमा लिएको छ ।
उनीहरूलाई वडा प्रहरी कार्यालय, विराटनगरमा राखेर अनुसन्धान थालिएको एसपी पोखरेलले शब्द एक्सप्रेसलाई जानकारी दिए ।
