विराटनगर । विराटनगर क्रिकेट क्लब (बिसिसी) मोरङ जिल्लास्तरीय ‘बी’ डिभिजन क्रिकेट प्रतियोगिताको च्याम्पियन बनेको छ ।
बुधबार विराटनगरको वैजनाथपुर क्रिकेट मैदानमा भएको फाइनल खेलमा विजयी हुँदै बिसिसी च्याम्पियन बनेको हो ।
फाइनल खेलमा बिसिसीले झोराहाटको ग्रामथान क्रिकेट क्लबलाई सुफर ओभरमा पराजित गरेको हो ।
खेलको निर्धारित ओभरमा दुवै टिमले बराबरी स्कोर गरेपछि खेल सुपर ओभरमा गएको थियो ।
टस जितेर ब्याटिङ गरेको बिसिसीले निर्धारित ३० ओभरमा सबै विकेट गुमाई एक सय ३९ रन बनाएको थियो । बिसिसीका अनिल यादवले ४१ रन बनाउँदा धीरज कामतले २३ रन जोडे ।
यस्तै, अमन गुप्ताले १२ रन र कृतिक कामतले ११ रनको योगदान दिए ।
ग्रामथानका आर्यन बाँस्कोटाले तीन विकेठ लिँदा निर्वेश लुइटेलले दुई विकेट लिए ।
एक सय ४० रनको विजयी लक्ष्य पछ्याएको ग्रामथानले निर्धारित ओभरमा सबै विकेट गुमाएर एक सय ३९ रन बनाएपछि खेल सुपर ओभरमा गएको थियो ।
ग्रामथानका अनिल विश्वकर्माले २८ रन बनाउँदा आर्यन बाँस्कोटाले नटआउट २० रन बनाए ।
निर्वेश लुइँटेलले १७ रन र विकाश कार्कीले १५ रनको योगदान दिए ।
बिसिसीका म्यान अफ फाइनल रितेश झाले चार विकेट लिँदा आर्यन शाहीले दुई विकेट तथा कृतिक कामत, आशीष राजवंशी र अभिषेक मण्डलले समान एक–एक विकेट विकेट लिए ।
प्रतियोगिताको उत्कृष्ट ब्याटर बिसिसीका राहुल चौधरी, उत्कृष्ट बलर बिसिसीका अविशेक मण्डल र म्यान अफ द सिरिज पनि बिसिसीका कृतिक कामत घोषित भए ।
माघ १७ गतेदेखि सुरु भएको प्रतियोगिता मोरङका १६ वटा बी डिभिजन क्लबहरू सहभागी रहेको जिल्ला अध्यक्ष महमद साद बाबुले बताए ।
विजयी तथा अन्य खेलाडीलाई प्रमुख अतिथि पूर्वराष्ट्रिय खेलाडी नन्दकिशोर राठी, मोरङ क्रिकेट संघका अध्यक्ष महमद साद बाबुलगायतले पुरस्कार तथा ट्रफी वितरण गरे ।
