झापा । झापाको बिर्तामोडस्थित पूर्वाञ्चल क्यान्सर हस्पिटलले विविध कार्यक्रम गरी विश्व क्यान्सर दिवस मनाएको छ । आइतबार हस्पिटलले क्यान्सरसँग सम्बन्धित विभिन्न सचेतनामूलक कार्यक्रम गरी क्यान्सर दिवस मनाएको हो ।
नेपाल क्यान्सर फाउन्डेसन, रोट्र्याक्ट क्लब अफ बिर्तामोड मिडटाउनलगायत संस्थासँगको सहकार्यमा सचेतनामूलक कार्यक्रमहरू गरेर क्यान्सर डे मनाइएको वरिष्ठ क्यान्सर रोग विशेषज्ञ डा. वीरेन्द्र यादवले जानकारी दिए ।
उनका अनुसार पूर्वाञ्चल क्यान्सर हस्पिटलबाट चारपाने–अर्जुनधारा–प्रणामी टोल हुँदै बिर्तामोडसम्म साइकल र्यालीको आयोजना गरिएको थियो ।
बिर्तामोडमा क्यान्सरसम्बन्धि सचेतनामूलक नाटक र सांगीतिक कार्यक्रम आयोजना गरिएको थियो । जसमा विद्यार्थीहरूको पनि उल्लेखनीय सहभागिता रहेको थियो ।
दिउँसो झापाका सम्पूर्ण स्थानीय तहका प्रतिनिधिलाई सहभागी गराएर क्यान्सरसँग सम्बन्धित अन्तर्क्रिया कार्यक्रम आयोजना भएको डा. यादवको भनाइ छ ।
नेपाल क्यान्सर फाउन्डेसनका कार्यकारी प्रमुख डा. यादवका अनुसार विगत चार वर्षयता झापाको बिर्तामोडमा सञ्चालित पूर्वाञ्चल क्यान्सर अस्पतालले सामाजिक जिम्मेवारी पूरा गर्न भन्दै प्रत्येक साता ‘क्यान्सर शिविर’ चलाउँदै आएको छ ।
हस्पिटलले आर्थिक अभावका कारण उपचार नपाएका क्यान्सरका बिरामीलाई निःशुल्क रूपमा उपचार गराइरहेको छ । जसअन्तर्गत हालसम्म पाठेघरको मुखको क्यान्सरबाट पीडित बनेका १४ हजार महिलाको उपचार निःशुल्क रूपमा गरिएको छ ।
तीन सय शैय्या क्षमताको अत्याधुनिक उपकरणसहितको उक्त अस्पतालमा २२ जना दक्ष चिकित्सकीय टोलीले उपचार सेवा दिइरहेका छन् ।