विराटनगर । विराटनगर महानगरपालिका-१० हस्पिटल चोकमा रहेको गोल्डेन अस्पताललाई मापदण्ड पूरा नगरी स्तरोन्नतिको अनुमति दिइएको पाइएको छ ।
कोसी प्रदेशको स्वास्थ्य मन्त्रालयले भौतिक संरचना निर्माण पूरा नभएको गोल्डेनलाई एक सय शय्याको अस्पताल सञ्चालनको लागि अनुमति दिएको हो ।
कोसीका तत्कालीन स्वास्थ्यमन्त्री जयराम यादवको मन्त्रीस्तरको निर्णयबाट भौतिक संरचना निर्माण नगरी एक वर्षअगाडि एक सय शय्याको अस्पताल सञ्चालनको लागि अनुमति दिइएको खुलेको छ ।
गोल्डेन अहिले भाडाको घरमा ५० शय्यामा सञ्चालनमा भइरहेको छ ।
उसले विराटनगर-११ मा नयाँ भवन निर्माण गरेर अस्पताल विस्तार गर्ने योजना बनाएकोमा सो भवन अझै बनिसकेको छैन ।
यस्तो अवस्थामा एक वर्ष अगाडि नै सय शय्याको अस्पताल सञ्चालनको अनुमति दिइएको हो ।
जबकि, स्वास्थ्य संस्था स्थापना, सञ्चालन तथा स्तरोन्नति मापदण्डसम्बन्धी निर्देशिका २०७०, जनस्वास्थ्य सेवा नियमावली २०७७ र स्वास्थ्य संस्था सञ्चालन मापदण्ड २०७७ अनुसार एक सय शय्याको अस्पताल सञ्चालन गर्न आफ्नै भवन हुनुपर्छ ।
तर, मन्त्रालयले आफ्नै भवन नबनाई एक सय शय्या सञ्चालनको अनुमति दिएपछि गोल्डेनले गैरकानुनी रूपमा भाडाकै घरबाट अस्पताल सञ्चालन गरिररहेको छ ।
गोल्डेनले अस्पताल स्तरोन्नतिको लागि २८ चैत २०७७ मा स्वास्थ्य मन्त्रालयमा निवेदन दिएको थियो ।
१० महिनाभित्रमा आफ्नै भवनमा अस्पताल लैजाने प्रतिबद्धता २०७९ कात्तिकमा मन्त्रालयमा बुझाएपछि तत्कालीन स्वास्थ्यमन्त्री यादवले ३० कात्तिकमा मन्त्रीस्तरको निर्णयबाट सय शय्याको अस्पताल सञ्चालनको अनुमति दिएका थिए ।
मन्त्रीको निर्णयपछि स्वास्थ्य मन्त्रालयले २ मंसिर २०७९ मा गोल्डेनलाई एक सय शय्यामा स्तरोन्नती गरी सञ्चालन गर्न अनुमति दिएको पाइएको छ ।
एक वर्षअगाडि नै अनुमति पाएको गोल्डेनको भवन निर्माणको काम अझै पूरा भएको छैन । उसले पुरानो भाडाको हस्पिटलबाटै एक सय शय्याको अस्पताल सञ्चालन गर्दै आएको छ ।
अस्पतालका सञ्चालक सनातन मण्डलले अस्पताल नयाँ भवनमा सरिसकेको दाबी गरेका छन् । तर, अस्पताल मापदण्ड पूरा नभएको भाडाको भवनबाट सञ्चालन भइरहेको छ ।
यता, गोल्डेनलाई मापदण्ड पूरा नगरी अस्पताल स्तरोन्नतिको अनुमित दिएको विषयमा अख्तियार दुरूपयोग अनुसन्धान कार्यालय इटहरीमा पनि उजुरी परेको छ ।
अख्तियार दुरुपयोग अनुसन्धान कार्यालय इटहरीका कार्यालय प्रमुख सुरेश न्यौपानेका अनुसार उजुरी परेपछि अनुसन्धान थालिएको छ ।
