अर्जेन्टिनी स्टार लियोनल मेस्सी पूर्व क्लब बार्सिलोना फर्कन असम्भव रहेको फुटबल क्लब बार्सिलोनाका अध्यक्ष जोआन लार्पोटाले बताएका छन् ।
स्पेनिस क्लब बार्सिलोनासँग बसाइँ दुःखद अन्त्य गर्दै फ्रान्सेली क्लब पेरिस सेन्ट जर्मेन (पिएसजी) पुगेको मेस्सीको पूनरागमनको प्रश्नको जवाफ दिने क्रममा अध्यक्ष लार्पोटाले यस्तो बताएका हुन् ।
स्पेनिस क्याटालन रेडियो आरएसी वानसँगको अन्तर्वार्ताको क्रममा बोल्दै बार्सिलोनाका अध्यक्ष लार्पोटाले मेस्सी बार्सिलोना फर्कन असम्भवन रहेको र यसबारे क्लबमा कुनै पनि प्रकारको छलफल सुरू नभएको खुलाएका छन् ।
‘सञ्चारमाध्यममा मेस्सी बार्सिलोना फर्कन सक्ने र त्यसका लागि उसले र उसका एजेन्टले क्लबसँग सम्पर्क गरिरहेको खबर सार्वजनिक भइरहेको छ’ अध्यक्ष लार्पोटाले आरएसी वानसँग भनेका छन्, ‘यी सबै गलत हुन् । न मैले मेस्सीबाट कुनै समाचार पाएको छु न उनका एजेन्हरुले सम्भावित ट्रान्सफरबारे मसँग छलफल गरेका छन् ।’
बार्सिलोनाले मेस्सीलाई फर्काउनेबारे कुनै योजना नबनाएको र क्लबका भावि योजनामा मेस्सी नरहेको लार्पोटाले स्पष्ट पारेका छन् ।
सन् २००० मा बार्सिलोनाको युथ एकेडेमी हुँदै बार्सिलोनाको जर्सिमा फुटबल खेल्न थालेका मेस्सीले नमिठो तरिकाले २१ वर्षपछि क्लब छाड्नु परेको थियो ।
आर्थिक सङ्कटमा परेको कारण देखाउँदै क्लबले मेस्सीको सम्झौता नवीकरण गर्न नसक्दा क्लविहीन बनेका मेस्सी पूर्व समकक्षी नेयर रहेको क्लब पिएसजी पुगेका छन् ।
तर फ्रान्सेली लिग वानमा अपेक्षित प्रदर्शन गर्न नसकेका मेस्सी आफ्नो दरिलो फर्म फर्काउन मेहनत गरिरहेका छन् ।
लिग वान, च्याम्पियन्स लिग र कोपा डी फ्रान्स गरी पिएसजीको जर्सिमा २६ खेल खेलिसकेका मेस्सीले सात गोल मात्र गरेका छन् ।
पिएजीको जर्सिमा तीन सय सात मिनेट बिताइसकेका मेस्सीले ११ असिस्ट गरेका छन् ।
मेस्सीका सात मध्येका पाँच गोल च्याम्पियन्स लिगमा भएको छ भने लिगमा उनको नाममा दुई गोल मात्र रहेको छ ।
मेस्सीको पिएसजीमा आगमन भएसँगै नेयमार र किलियन एमबाप्पेसँगको ट्रायोले थुप्रै सफलता हात पार्ने अपेक्षा गरिएको थियो । तर उनीहरुको प्रदर्शनमा अझै तालमेल हुन सकिरहेको छैन ।
एमबाप्पे यस सिजन अन्त्यसँगै नयाँ क्लबमा जान सक्ने र नेयमारले पनि क्लब छाड्ने चर्चा चलिरहँदा मेस्सीको भविष्य के हुने भन्ने थप अन्योल छाएको छ ।
बार्सिलोनाका अध्यक्षले मेस्सीका लागि क्लबमा ठाउँ नहुने भनिरहँदा अब आउँदा सिजन मेस्सी पिएसजीमा रहलान् वा उनलाई नयाँ जर्सिमा देख्न पाइने हो ? यो प्रश्नको जवाफ मेस्सी र समयबाहेक कसैले पनि दिन सक्दैन ।
