पेरिस सेन्ट जर्मेन (पिएसजी) का अर्जेन्टाइन स्टार लियोनल मेस्सीले नयाँ वर्ष २०२२ को आफ्नो पहिलो खेल खेल्दैछन् ।
२०२१ को अन्तिमतिर कोरोना संक्रमण भएदेखि मैदानमा नदेखिएका मेस्सी फ्रान्सेली लिग वानमा रिम्सविरुद्ध मैदान उत्रेर २०२२ सुरू गर्दैछन् ।
कोभिड संक्रमणबाट मुक्त भइसकेका मेस्सी प्रशिक्षणमा फर्किसकेका छन् र उनकाे प्रर्दशनबाट प्रशिक्षक माउरिसियो पोचेटिनो सन्तुष्ट छन् ।
शनिबार भएकाे पत्रकार सम्मेलनमा पिएसजीका प्रशिक्षक पोचेटिनोले मेस्सी आजको खेलमा खेल्ने टोलीमा हुने सार्वजनिक गरिसकेका छन् ।
१६ वर्षे बार्सिलोना बसाइँ दुःखद तरिकाले टुङ्ग्याएका मेस्सीले लिग वानमा अपेक्षित प्रदर्शन गर्न सकिरहेका छैनन् ।
२१/२२ काे सिजनको मध्यभागसम्म आइपुग्दा पिएसजीबाट १६ खेल खेलेका मेस्सीले ६ गोल र पाँच असिस्ट मात्रै गरेका छन् ।
लिग वानका मेस्सीको प्रदर्शन उदेक लाग्दो छ । ११ खेल खेलिसकेका मेस्सीको नाममा लिग वानमा मात्र एक गोल रहेको छ ।
फ्रान्सेली लिगमा पाँच असिस्ट गर्न भ्याएका मेस्सीले पिएसजीका लागि च्याम्पियन्स लिगमा भने गज्जब प्रदर्शन गरिरहेका छन् ।
पिएसजीको जर्सीमा पाँच च्याम्पियन्स लिगका खेल खेलिसकेका मेस्सीले पाँच गोल गरिसकेका छन् ।
च्याम्पियन्स लिगको समूह ‘ए’ मा रहेको पिएसजीलाई समूह उपविजेता बनाउँदै अन्तिम १६ मा पुर्याउन मेस्सीले म्यानचेस्टर सिटी, आरबी लाइपजिग र क्लब ब्रुगविरुद्ध गोल गरेका थिए ।
सिजनको पहिलो हाफसम्म फ्रान्समा खासै चल्न नसकेका मेस्सीलाई आजको खेलसँगै थप दबाब बढेको छ ।
लिगमा राम्रो प्रदर्शन गर्न नसकिरहेका मेस्सीलाई च्याम्पियन्स लिगको अन्तिम १६ मा रियल मड्रिड प्रतिद्वन्द्वी पर्नुले पिएसजी बसाइँ कठिन हुने निश्चित छ ।
विश्वमा सर्वाधिक सात पटक बालोन डी ओर जितिसकेका मेस्सी कठिन परिस्थितीबाट अघि बढ्न सक्ने खेलाडीका रुपमा परिचित छन् ।
तर बाँकी सिजन पिएसजीमा उनको प्रदर्शन कस्तो हुने हो ? त्यसको लागि हामीले जारी २१/२२ को पूरा सिजन पर्खनु पर्ने हुन्छ ।
मेस्सी सम्मेलित पिएसजी लिग वान अङ्कतालिकाको शीर्ष स्थानमा छ । पिएसजीको २१ खेलबाट ५० अङ्क छ । पिएसजीभन्दा एक खेल बढी खेलेको नाइस ४२ अङ्कको साथ दोस्रो स्थानमा छ ।
