स्थानीय र प्रहरीबीचको झडपपछि स्थिती तनावपूर्ण बनेकाले थप क्षति हुन नदिन जिल्ला प्रशासन कार्यालय मोरङले लेटाङ क्षेत्रमा अनिश्चितकालीन कर्फ्यूको आदेश जारी गरेको छ ।
प्रशासन कार्यालय मोरङले आज (सोमबार) बिहान ७ बजेदेखि अर्को सूचना जारी नभएसम्मका लागि कर्फ्यू आदेश जारी गरेको बताएको हो ।
आइतबार लेटाङ ५ मा रहेको शिक्षा विकास माध्यमिक विद्यालयका शिक्षक मनोज पौडेललाई पक्राउन गर्न मोरङ प्रहरी टोली पुगेको थियो ।
विद्यालयमा अध्ययनरत छात्रामाथि यौन दुर्व्यवहार गरेको आरोप लागेका शिक्षक पौडेललाई पक्राउ गर्न लेटाङ पुगेको प्रहरी टोली र स्थानीयबीच दिनभर झडप भएको थियो ।
शुक्रबार छात्रामाथि यौन दुर्व्यवहारकाे आरोप लागेका शिक्षक पौडेल आइतबार विद्यालयमा उपस्थित भएको थाहा पाएपछि स्थानीयले विद्यालय घेराउ गरी पौडेललाई विद्यालयबाहिर निकालेर कुटपिट गर्न खोजेपछि स्थिती तनावपूर्ण भएको थियो ।
दिनभर स्थानीयले अवरोध गरेपछि राती आरोपित शिक्षकलाई लिएर लेटाङबाट विराटनगर आउने क्रममा प्रहरी टोलीमाथि स्थानीय जाइलागेका थिए ।
सो आक्रमणमा परी एक प्रहरी जवानको मृत्यु भएको छ भने स्थानीय र प्रहरी गरी दुई दर्जनबढी घाइते भएका छन् ।
घटनामा घाइते भएकाहरुको मोरङ्गका विभिन्न अस्पतालमा उपचार भइरहेको छ ।
राती घटनाले उग्र रुप लिएकाले स्थितीलाई नियन्त्रणमा लिन मोरङ्ग प्रशासनले लेटाङको पूर्वमा मोरङ्गे खोला क्षेत्र, पश्चिममा चिसाङ खोला क्षेत्र, उत्तरमा ६ नम्बर वडा कार्यालय क्षेत्र र लेटाङ वडा ३ र ४ को पश्चिम गङ्गे चोक र कमलपुर क्षेत्रमा अनिश्चितकालिन कफ्र्यू जारी गरेको हो ।
कर्फ्यू जारी भएसँगै लेटाङ क्षेत्रको स्थिती सामान्य रहेको प्रदेश १ प्रहरी कार्यालयले जानकारी दिएको छ ।
प्रदेश १ का प्रमुख अरुणकुमार बिसीका अनुसार घटनाबारे अनुसन्धान भइरहेको र लेटाङ क्षेत्रमा थप क्षति हुन नदिन गरी कडा सुरक्षा व्यवस्था गरिएको छ ।
