हाेलीमा प्रयाेग गरिने रङ्गले निम्त्याउने विभिन्न समस्यामध्ये दम (अस्थमा) पनि एक हो ।
होलीको रङ्ग दमका रोगीलाई विष बराबर हुनसक्छ । रङ्ग अनुहारमा लगाउँदा वा अन्जानमा मुखभित्र पसेमा यस्ता रङ्गले बिरामीलाई अस्थमाको अट्याक गराउन सक्छ ।
होलीको एक दिन अघि हुने होलिका दहनमा बालिने आगोबाट निस्कने धुँवा र खरानीका कारण श्वासप्रश्वास सम्बन्धी समस्याको जोखिम बढ्छ ।
अस्थमाका बिरामीले सामान्य सतर्कता अपनाए ‘अस्थमा अट्याक’ आउने चिन्ता बिना होलीमा रमाइलो गर्न सक्छन् ।
अस्थमाका बिरामीले होली खेल्दा सुख्खा रङ्गको प्रयोग गर्न हुदैन ।
सुख्खा रङ्गमा रहेका कण लामो समयसम्म हावामा तैरिरहने हुँदा यी कण फोक्सोमा प्रवेश गरि सास फेर्न समस्या हुन सक्छ ।
अस्थमाका बिरामीले होली खेल्नका लागि कृत्रिम रङ्गको साटो प्राकृतिक रङ्गको प्रयोग गर्नुपर्छ ।
होलीका रङ्गले अस्थमाको अट्याक आउने डर रहने हुँदा बिरामीले जहिले पनि आफ्नो इनहेलर सधैँ आफूसँग राख्नु बुद्धमानी हुन्छ।
यसबाहेक अस्थमाका बिरामीले भीडमा नजाने, मास्क लगाउने, मदिराजन्य पदार्थको सेवन नगर्ने, धुम्रपान नगर्ने जस्ता कुरामा ध्यान दिएमा उनीहरूले सुरक्षित तरिकाले रमाइलोसँग होली मनाउन सक्छन् ।
रङ्गले अस्थामा पीडित बच्चाहरूलाई धेरै चाँडो असर गर्ने हुँदा अभिभावकले विशेष सतर्कता अपनाउनुपर्ने हुन्छ ।
होली खेल्दा अप्ठ्यारो महसुस भए, सास फेर्नु गाह्रो भएमा आफूखुसी औषधिको सेवन गर्ने वा घरेलु उपचार गर्ने जस्ता उपाय अपनाएर समय बर्बाद गरि स्वास्थ्यलाई जोखिममा राख्नु भन्दा पनि तुरुन्तै चिकित्सकसँग परामर्श लिन जरुरी हुन्छ ।
