साफ यू–१८ महिला च्याम्पियनसिपको पहिलो खेलमा नेपाल भारतसँग ७-० गोलान्तरले पराजित बनेको छ ।
भारतस्थित जमसेदपुर रङ्गशालामा आजबाट सुरू भएको च्याम्पियनसिपमा नेपाल भारतसामु निरीह देखियो ।
पहिलो हाफमा नेपालको पोस्टमा तीन गोल गरेको भारतले दोस्रो हाफमा चार गोल थपेपछि विशाल अन्तरको जित दर्ता गर्न सफल भयो ।
भारतका लागि पहिलो गोल सुजिश पोट्टेक्कटले गरीन् । नेपाली गोलरक्षक सावित्री किसानको क्लिरेन्स गतिलो नभएको फाइदा उठाउँदै सुजिशले खेलको १४औं मिनेटमा सुरुवाती अग्रता दिलाउन सफल भइन् ।
लिन्डा कोम सेर्तोले १७औं र ३५औं मिनेटमा दुई गोल गरेपछि भारतले पहिलो हाफअघि नेपालविरुद्ध तीन गोलको गतिलो अग्रता लियो ।
दोस्रो हाफमा केही सुधार गरे पनि नेपालले गोल खाने क्रम रोकिएन ।
खेल अवधिभर खेललाई पूर्ण नियन्त्रणमा राख्न सफल भारतले दोस्रो हाफमा पनि नेपालविरुद्ध गोलको वर्षा गर्यो ।
६९औं मिनेटमा अपूर्ण नर्जरीले पेनाल्टी क्षेत्र नजिकैबाट हाफ टर्न गर्दै भारतको लागि चौथो गोल गरिन् ।
७२औं मिनेटमा भारतकी अनिता कुमारी वान भर्सेज वानमा गोल गर्न चुक्दा भारत पाँचौँ गोल गर्नबाट रोकिएको थियो ।
खेलको ७६औं मिनेटमा पूर्णिमा कुमारीले हेडमार्फत गोल गरिन् । राइट फ्ल्याङ्कबाट आएको प्रिकिक प्रहारलाई पूर्णिमाले गोल गर्दै पोस्टको दिशा दिँदा नेपाली डिफेन्स र गोलरक्षक मुकदर्शक बन्यो ।
८६औं मिनेटमा छैटौँ गोल गर्दै भारतले आफ्नो दबदबा कायम राख्यो । पेनाल्टी क्षेत्रभित्रबाट सुनिता मुन्डाले भारतका लागि छैटौँ गोल थपिन् ।
अतिरिक्त समयमा भारतले गोल गरे पनि रेफ्रिले अफसाइडको सङ्केत गरेपछि नेपाल सातौं गोल खानबाट रोकिएको थियो ।
तर त्यसको एक मिनेटपछि नै नेपालले सातौं गोल खान पुग्यो । भारतका लागि सातौं गोल नितु लिन्डाले ९७औ. मिनेटमा गरिन् ।
नेपाललाई ७-० ले हराएसँगै भारत अङ्कतालिकाको शीर्ष स्थानमा उक्लिएको छ ।
डबल राउन्ड रोबिन लिगका आधारमा हुने च्याम्पिनसिपमा नेपाल, भारत र बङ्गलादेशले सहभागिता जनाएका छन् ।
मार्च १५ बाट सुरू भएको च्याम्पियनसिप २५ मार्चसम्म सञ्चालन हुनेछ ।
दर्शन भक्त राज लावतको प्रशिक्षणमा भारत पुगेको नेपाली राष्ट्रिय महिला टोलीको कप्तानी प्रीती राईले गरिरहेकी छिन् ।
२३ सदस्यीय नेपाली टोलीको सहायक प्रशिक्षकमा भगवती थापा रहेकी छिन् भने श्रीप्रकाश वैद्यले गोलरक्षक प्रशिक्षकको भूमिका निर्वाह गरिरहेका छन् ।
नेपालले दोस्रो खेल मार्च १७ मा बङ्गलादेशदेश खेल्नेछ ।
बङ्गलादेशको खेलसँगै पहिलो राउन्डको अन्त्य हुँदा नेपालले दोस्रो राउन्डको पहिलो खेलमा भारतसँग मार्च २१ र दोस्रो खेलमा बङ्गलादेशसँग मार्च २३ मा खेल्नेछ ।
तस्बिरमा हेर्नुस नेपाल भर्सेज भारत
