भारतमा आजबाट सुरु भएको यू–१८ साफ महिला च्याम्पियनसिप फुटबल प्रतियोगितामा नेपालले खराब सुरुवात गरेको छ ।
भारतको जमसेदपुरमा भएको खेलमा उद्घाटन खेलमा नेपालले आयोजक भारतसँग ७-० गोल अन्तरले पराजित भएको हो ।
घरेलु टिम भारतका लागि लिन्डा कोम सेर्तोले दुई गोल गरिन् भने सुजेश, अपूर्ण नर्जरी, पूर्णिमा कुमारी र सुनिता मन्डले एक-एक गोल गरिन् ।
खेलको १४ औँ मिनेटमा सुजेशले गोल गर्दै भारतलाई सुरुवाती अग्रता दिलाइन् ।
त्यसको तीन मिनेटपछि नै लिन्डाले गोल गर्दै भारतको अग्रता दोब्बर बनाइन् ।
खेलको ३५ औँ मिनेटमा लिन्डाले दोस्रो गोल गर्दै भारतलाई पहिलो हाफभरि ३-० गोलको अग्रता दिलाइन् ।
खेलको दोस्रो हाफमा भने भारतले एक गोल गरेको थियो ।
खेलको ६८ औँ मिनेटमा अपूर्ण नर्जरीले गोल गर्दै भारतको अग्रता फराकिलो बनाइन् ।
खेलको ७६ औँ मिनेटमा पूर्णिमा कुमारीले गोल गरेपछि भारतले ५-० गोलान्तरको अग्रता बनायो ।
खेलको ८६ औँ मिनेटमा सुनिता मुन्डले गोल गरेपछि भारतले फराकिलो अग्रता बनाएको हो ।
खेलको इन्ज्युरी समयमा नितु लिन्डाले गोल गरेपछि भारत ७-० गोलले विजयी भएको हो ।
जितसँगै भारतले प्रतियोगितामा सुखद सुरुवात गरेको छ भने नेपालले खराब सुरुवात गरेको छ ।
च्याम्पियनसिपमा नेपाल, भारत र बङ्गलादेशले प्रतिस्पर्धा गर्दै छन् ।
डबल राउन्ड रोबिन लिगका आधारमा खेलाइने च्याम्पियनसिपको दोस्रो खेलमा नेपालले मार्च १७ मा बङ्गलादेशको सामना गर्ने छ ।
यस्तै, तेस्रो खेल नेपालले मार्च २१ मा फेरि भारतसँग र चौथो खेल मार्च २३ मा बङ्गलादेशसँग खेल्ने छ ।
शीर्ष टोली च्याम्पियन बन्नेछ ।
मार्च २५ तारिखसम्म आयोजना हुने यु–१८ महिला साफ महिला च्याम्पियनसिप फुटबलमा सहभागिता जनाउन नेपाली महिला टोली आइतबार भारत पुगेको हो ।
सन् २०१८ मा भुटानमा भएको पहिलो प्रतियोगिताको सेमिफाइनलमा भारतलाई हराएको नेपाली टिम बङ्गलादेशसँग पराजित भएपछि उपाधिबाट बञ्चित भएको थियो ।
च्याम्पियनसिपका लागि नेपाली टोलीका मुख्य प्रशिक्षक दर्शनभक्त राजलवटले २३ सदस्सीय खेलाडी टोलीको घोषणा गरेका थिए ।
नेपाली टोलीमा सावित्री किशन, लीला जोशी, पूजा थापा, सबिना चौधरी, मञ्जुकुमारी खड्का, प्रतीक्षा चौधरी, कुमारी तामाङ, प्रिया बस्नेत, दिव्या यास्माली मगर छन् ।
यस्तै, दीपा शाही, हिमा रावत, सरस्वती हमाल, प्रीति राई, शुनकला राई, अञ्जली मछामासी, सराह बज्राचार्य, जेनिफर राना, शरिश्मा थापा, सुदीपा भोलान, कुसुम खतिवडा, अमिशा कार्की, मनमाया दमाई र गरिमा राई रहेका छन् ।
