भारतको जमसेदपुरमा मङ्गलबार (आज) बाट आयोजना हुने साफ यू–१८ महिला च्याम्पियनसिप फुटबल प्रतियोगिता सुरु हुँदैछ ।
यु-१८ महिला साफको उद्घाटन खेलमा नेपालले आयोजक भारतको सामना गर्ने छ ।
नेपाल र भारतबीचको खेल बेलुका ७:१५ बजे सुरु हुने छ ।
नेपाल र भारत दुवै टिम एकअर्कालाई हराउँदै प्रतियोगितामा सुखद सुरुआत गर्न चाहन्छन् ।
नेपाली टोलीका मुख्य प्रशिक्षक दर्शन भक्तराजलवटले घरेलु टोलीविरुद्ध खेल्न कठिन हुने बताउँछन् ।
‘घरेलु टोलीसँग खेल्न सधैँ गाह्रो हुन्छ तर हामी आफ्नो उत्कृष्ट खेल्ने छौं । परिस्थिति अनुसार खेल्ने छौँ,’ प्रशिक्षक दर्शनले भने ।
नेपाली टोलीकी कप्तान प्रिति राईले तीन टोली सम्मिलित प्रतियोगितामा आफ्नो लक्ष्य उपाधि उचाल्ने रहेको बताइन् ।
नजिकिँदै गरेको महिला लिगका लागि खेलाडीले तयारी गरिहेकाले खेलाडीको फिटनेस राम्रो भएको र बलिया टोली भए पनि राम्रो खेलेर उपाधि लिएर आउने कप्तान राईले बताइन् ।
लगातार दुई संस्करणको उपाधि विजेता बङ्गलादेश र पछिल्लो संस्करणको उपविजेता आयोजक भारतसँग खेल्ने नेपाली टोलीले करिब एक महिनाको प्रशिक्षण अनुभव लिएर प्रतियोगितामा सहभागिता जनाउँदै छ ।
महिला टोलीलाई अनुभवी बनाउने लक्ष्यसहित प्रतियोगितामा सहभागिता जनाउन लागेको भन्दै महिला विभाग प्रमुख हरि खड्काले बलिया टोलीसँग राम्रो फुटबल खेलेर स्वदेश फर्किने बताए ।
सन् २०१८ मा भुटानमा भएको पहिलो प्रतियोगिताको सेमिफाइनलमा भारतलाई हराएको नेपाली टिम बङ्गलादेशसँग पराजित भएपछि उपाधिबाट वञ्चित भएको थियो ।
च्याम्पियनसिपमा नेपाल, भारत र बङ्गलादेशले प्रतिस्पर्धा गर्दै छन् ।
डबल राउन्ड रोबिन लिगका आधारमा खेलाइने च्याम्पियनसिपको दोस्रो खेलमा नेपालले मार्च १७ मा बङ्गलादेशको सामना गर्ने छ ।
यस्तै, तेस्रो खेल नेपालले मार्च २१ मा फेरि भारतसँग र चौथो खेल मार्च २३ मा बङ्गलादेशसँग खेल्ने छ ।
शीर्ष टोली च्याम्पियन बन्नेछ ।
मार्च २५ तारिखसम्म आयोजना हुने यु–१८ महिला साफ महिला च्याम्पियनसिप फुटबलमा सहभागिता जनाउन नेपाली महिला टोली आइतबार भारत प्रस्थान गरेको हो ।
च्याम्पियनसिपका लागि नेपाली टोलीका मुख्य प्रशिक्षक दर्शनभक्त राजलवटले २३ सदस्सीय खेलाडी टोलीको घोषणा गरेका थिए ।
नेपालले उपाधि जित्ने लक्ष्य राखेको टोलीका प्रशिक्षक दर्शनले दाबी गरेका छन् ।
नेपाली टोलीमा सावित्री किशन, लीला जोशी, पूजा थापा, सबिना चौधरी, मञ्जुकुमारी खड्का, प्रतीक्षा चौधरी, कुमारी तामाङ, प्रिया बस्नेत, दिव्या यास्माली मगर छन् ।
यस्तै, दीपा शाही, हिमा रावत, सरस्वती हमाल, प्रीति राई, शुनकला राई, अञ्जली मछामासी, सराह बज्राचार्य, जेनिफर राना, शरिश्मा थापा, सुदीपा भोलान, कुसुम खतिवडा, अमिशा कार्की, मनमाया दमाई र गरिमा राई रहेका छन् ।
