बार्सिलोनाले स्पेनिस ला लिगामा ओसासुनामाथि सानदार जित निकालेको छ ।
घरेलु मैदानमा आइतबार राति भएको खेलमा बार्सिलोनाले ओसासुनालाई ४–० गोलले हरायो ।
जितसँगै बार्सिलोना अंक तालिकाको तेस्रो स्थानमा उक्लिएको छ ।
पहिलो हाफमा तीन गोल गरेको बार्सिलोनाले दोस्रो हाफमा एक गोल थपेको थियो ।
बार्सिलोनाको फराकिलो जितमा फेरान टोरेसले १४औँ र २१औँ मिनेटमा दुई गोल गरे ।
पिएरे इमरिक औबामियाङले २७औँ र रिकी पुचले ७५औँ मिनेटमा एक एक गोल गरे ।
जितसँगै तेस्रो स्थानमा उक्लिएको बार्सिलोनाले २७ खेलबाट ५१ अंक बनाएको छ ।
चौथो स्थानमा रहेको एट्लेटिको म्याड्रिडको पनि ५१ अंक छ ।
पराजित ओसासुना ३५ अंकसहित ११औँ स्थानमा छ ।
शीर्षस्थानमा रहेको रियल म्याड्रिडको ६३ र दोस्रो स्थानमा रहेको सेभियाको ५६ अंक छ ।
सेभिया रायो भालेकानोसँग १–१ गोलको बराबरीमा रोकियो ।
अन्य खेलमा रियल सोसिडाडले अलाभेस तथा रियल बेटिसले एथलेटिक बिल्बाओलाई समान १–० गोलले हराएको छ ।
पिएसजीको जित
स्टार खेलाडीद्वय केलियन एमबाप्पे र नेयमार चम्किएपछि फ्रेन्च लिग वानमा पेरिस सेन्ट जर्मेन (पिएसजी) ले रेलिगेसनमा रहेको बोर्डेअक्समाथि सानदार जित निकालेको छ ।
घरेलु मैदानमा आइतबार राति भएको खेलमा पीएसजीले बोर्डेअक्सलाई ३–० गोलले हरायो ।
पीएसजीको जितमा एमबाप्पे र नेयमारसँगै अर्को गोल लियान्द्रो ड्यानियल पेरेडेसले गरे ।
एम्बाप्पेले २४औँ, नेयमारले ५२औँ र पारेडेसले ६१औँ मिनेटमा गोल गरेका थिए ।
जितसँगै पीएसजीले शीर्षस्थानमा १५ अंकको अग्रता लिएको छ । पीएसजीको २८ खेलबाट ६५ अंक पुगेको छ ।
दोस्रो स्थानमा रहेको मार्सेली र तेस्रो स्थानमा रहेको निसको समान ५० अंक छ ।
समान खेलबाटै मार्से र निसको ५० अंक छ । पराजित बोर्डेअक्स २२ अंक सहित अन्तिममा छ ।
आइतबार रातिनै भएको खेलमा मार्सेलीले ब्रेस्टलाई ४–१ गोलले पराजित गरेको थियो ।
चेल्सी र आर्सनललाई सफलता
इङ्लिस प्रिमियर लिग फुटबलमा चेल्सी र आर्सनलले सफलता हात पारेका छन् ।
आइतबार राति भएको खेलमा चेल्सीले न्युक्यासल युनाइटेडलाई १-० गोलले हरायो ।
अर्को खेलमा आर्सनलले लेस्टर सिटीलाई २-० गोलले स्तब्ध बनायो ।
घरेलु मैदानमा चेल्सीलाई जिताउन काई हाभर्टजले ८९औँ मिनेटमा निर्णायक गोल गरे ।
जितसँगै तेस्रो स्थानमा रहेको चेल्सीले २८ खेलबाट ५९ अंक बनाएको छ ।
पराजित न्युक्यासल ३१ अंक सहित १४औँ स्थानमा छ । यस्तै आर्सनललाई जिताउन थोम पार्टीले ११औँ र अलेक्सान्द्रे लाकाजेट्टीले ५९औँ मिनेटमा गोल गरे ।
जितसँगै आर्सनल चौथो स्थानमा उक्लिएको छ ।
आर्सनलको २६ खेलबाट ५१ अंक छ ।
पराजित लेस्टर ३३ अंक सहित १२औँ स्थानमा छ ।
शीर्षस्थानमा रहेको म्यानचेस्टर सिटीको ६९ र दोस्रो स्थानमा रहेको लिभरपुलको ६६ अङ्क छ ।
इन्टर बराबरीमा रोकियो
इटालियन सिरी ‘ए’ मा साविक विजेता इन्टर मिलान बराबरीमा रोकिएको छ ।
आइतबार राति भएको खेलमा इन्टर टोरिनासँग १–१ गोलको बराबरीमा रोकिएको हो ।
टोरिनोको मैदानमा भएको खेलको अन्तिम समयमा गोल गर्दै इन्टरले बराबरी खेलेको हो ।
खेलको इन्ज्युरी समयमा एलेक्सिस सान्जेजले गोल गर्दै इन्टरलाई बराबरीमा फर्काएका हुन् ।
त्यसअघि खेलको १२औँ मिनेटमा ग्लेसन ब्रेमरले गोल गर्दै टोरिनोलाई अग्रता दिलाएका थिए ।
बराबरीसँगै इन्टरलाई उपाधि होडमा धक्का लागेको छ । साथै, उसले दोस्रो स्थानमा उक्लिने मौका गुमायो ।
तेस्रो स्थानको इन्टरले २८ खेलमा ५९ अङ्क जोडेको छ । टोरिनो भने ३५ अङ्कका साथ ११औँ स्थानमा छ ।
डर्टमण्डको साँघुरो जित
जर्मन बुन्डेसलिगा फुटबलमा बोरुसिया डर्टमण्डले साँघुरो जित निकालेको छ ।
आइतबार राति भएको खेलमा डर्टमण्डले अर्मिनियालाई १-० गोल अन्तरले हराएको हो ।
डर्टमण्डको जितमा मारिउस उल्फले निर्णायक गोल गरे ।
उनले खेलको २१ औं मिनेटमा गोल गरेका थिए ।
जितसँगै डर्टमण्डले २५ खेलमा ५३ अंक जोडेको छ ।
डर्टमण्ड दोस्रो स्थानमा रहेको छ ।
आर्मिनिया २५ अंक जोडेर १५ औं स्थानमा रहेको छ ।
यो पनि:
