राष्ट्रिय प्रजातन्त्र पार्टी नेपालले आफ्नो पार्टीको कार्यनीति भित्र राजसंस्थाको पुनर्स्थापना नरहेको स्पष्ट पारेको छ ।
बुधबार काठमाडौँमा आयोजित एक कार्यक्रममा बोल्दै राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले पार्टीको नीतिभित्र राजसंस्थाको पुनर्स्थापना नरहेको स्पष्ट पारको हुन् ।
‘राजसंस्थाप्रति आस्था र सम्मान अझै छ, सदैव रहनेछ’ अध्यक्ष थापाले भने, ‘तर अहिलेको राप्रपा नेपालको कार्यनीति भित्र नेपालमा राजसंस्था पुनर्स्थापना छैन, यसमा सबै जना स्पष्ट रहनुहोस् ।’
राप्रपा नेपालको अबको नीतिभित्र हिन्दु राष्ट्र, सुशासन, समृद्धि, धर्मनिरपेक्षताको खारेजी र सङघीयताको परिमार्जन रहने उनले सार्वजनिक गरेका छन् ।
पार्टीका मनोनित पदाधिकारीहरुलाई प्रमाणपत्र प्रदान गरिएको उक्त कार्यक्रममा राप्रपा नेपाल अध्यक्ष थापाले सबै पदाधिकारीहरुलाई उत्साहका साथ काम गर्न निर्देशनसहित दिएका छन् ।
राष्ट्रिय प्रजातन्त्र पार्टीको एकता महाधिवेशनमा राजेन्द्र लिङ्देनसँग पराजित बनेका थापाले राप्रपासँगको यात्रामा पूर्णविराम लगाउँदै आफू अध्यक्ष रहने गरी राप्रपा नेपाल सुरुवात गरेका छन् ।
हाल उनी राप्रपा नेपालको प्रचार–प्रसार र कार्यकर्ता भेटघाटमा व्यस्त छन् ।
