आइतबार बस्ने संसद् बैठकमा अमेरिकी सहयोग निकाय मिलेनियम च्यालेन्ज कर्पोरेसन (एमसिसी) अनुदान सहायता सम्झौतामाथि छलफल हुने भएको छ ।
शनिबार सार्वजनिक भएको सम्भावित कार्यसूचीअनुसार एमसिसीमाथि छलफल हुने छ । एमसिसीको प्रस्ताव अर्थमन्त्री जनार्दन शर्माले प्रस्तुत गर्ने छन् ।
सङ्घीय संसद्का महासचिव भरतराज गौतमले आइतबारको बैठकको सम्भावित कार्यसूची सार्वजनिक गरेका हुन् ।
आइतबार दिउँसो १ बजे बस्ने बैठकमा प्रधानमन्त्री शेरबहादुर देउवाले ‘महान्यायाधिवक्ताको वार्षिक प्रतिवेदन प्रस्तुत गर्ने छन्।
देउवाले महान्यायाधिवक्ताको वार्षिक प्रतिवेदन, आर्थिक वर्ष २०७७/७८ पेस गर्नुहुने कार्यसूचीमा उल्लेख छ ।
सम्भावित कार्यसूचीको दोस्रो एमसिसी सम्झौतामाथि छलफल हुने उल्लेख छ ।
यसअघि प्रधानमन्त्री देउवाको आग्रहमा बिहीबारका लागि तोकिएको बैठक शुक्रबार दिउँसो १ बजेका लागि सारिएको थियो ।
शुक्रबारको बैठकअघि एमसीसीको विषयमा सहमति नभएपछि बैठक आइतबारका लागि सारिएको हो।
सभामुख अग्निप्रसाद सापकोटाले बैठक अघि कार्यव्यवस्था परामर्श समिति बैठक आह्वान गरेका छन् ।
सभामुखका प्रेस सल्लाहकार श्रीधर न्यौपानेका अनुसार कार्यव्यवस्था परामर्श समितिको बैठक आइतबार बिहान साढे ११ बजे नयाँ बानेश्वरस्थित शंकर हलमा बस्ने छ ।
बैठकले प्रतिनिधिसभा बैठकको कार्यसूची तय गर्ने छ।
