बलात्कारको अभियोगमा अभिनेता पल शाहविरुद्ध जिल्ला प्रहरी कार्यालय, तनहुँमा जाहेरी परेपछि अभिनेत्री पूजा शर्मा पलको बचाउमा बोलेकी छन् ।
फिल्म ‘म यस्तो गीत गाउँछु-२’ को प्रिमियर सोबाट निस्किएपछि नायिका शर्माले पलको अनेकन् योगदान सम्झेर एउटा गल्ती बिर्सिनुपर्ने बताउँदै पलको बचाउ गरेकी हुन् ।
पल अभिनित सो चलचित्र शुक्रबारबाट देशैभरि प्रदर्शनमा आउँदै छ । रिलिज हुनुअघि उनीविरुद्ध जाहेरी परेको हो ।
‘पल शाह १२ वर्षदेखि स्ट्रगल गरेर ओ ठाउँसम्म आएको हो, उसले कलाकारिता क्षेत्रमा गरेको योगदानलाई सम्झौँ । उसको एउटा गल्तीलाई बिर्सिदिउँ,’ पूजाले भनेकी छन् ।
विवाहको प्रलोभनमा नाबालिग गायिकामाथि बलात्कार गरेको अभियोगमा बुधबार शाहविरुद्ध तनहुँमा पीडित परिवारले जाहेरी दिएको हो ।
यसअघि गायिकाको परिवार जाहेरी दिन कास्की पुगेको थियो ।
कास्कीमा उजुरी दर्ता नभएपछि पीडित परिवार जाहेरी लिएर तनहुँ आएको हो ।
शाहले नाबालिक गायिकामाथि अन्तिम पटक यौन शोषण गरेको स्थल तनहुँ जिल्लाको दुलेगौडा भएकाले किशोरीले तनहुँमा पीडित युवतीका बुबाले तनहुँमा किटानी जाहेरी दिएका थिए ।
गत वैशाख १४ गते पोखराको एक घरमा रहेका बेला पलले मदिराको तालमा ती नाबालिग बसेको कोठामा गएर ललाइफकाई ‘बिहे गर्छु, धोका दिन्नँ’ भन्ने विश्वास दिलाइ असहमति हुँदाहुँदै जबरजस्ती करणी गरेको आरोप पनि जाहेरीमा उल्लेख छ ।
उजुरी परेपछि अभिनेता पल शाहविरुद्ध पक्राउ पुर्जी जारी भएको छ ।
जिल्ला अदालत तनहुँले बुधबार अभिनेता पल शाहविरुद्ध पक्राउ पुर्जी जारी गरेको प्रहरी स्रोतले जानकारी दिएको छ।
स्रोतका अनुसार पक्राउ पुर्जी जारी गरी काठमाडौं प्रहरीमा परिपत्र भइसकेको छ ।
https://twitter.com/SiudiLeep/status/1496496396253671426?s=20&t=Nt6KGLJk9PY16nPGRzGYSw
