बलात्कारको अभियोगमा अभिनेता पल शाहविरुद्ध जिल्ला प्रहरी कार्यालय, तनहुँमा बुधबार पीडित परिवारले जाहेरी दिइएको छ ।
विवाहको प्रलोभनमा नाबालिग गायिकामाथि बलात्कार गरेको अभियोगमा शाहविरुद्ध तनहुँमा जाहेरी दिइएको प्रहरीले जनाएको छ ।
यसअघि गायिकाको परिवार जाहेरी दिन कास्की पुगेको थियो ।
कास्कीमा उजुरी दर्ता नभएपछि पीडित परिवार जाहेरी लिएर तनहुँ आएको हो ।
शाहले नाबालिक गायिकामाथि अन्तिम पटक यौन शोषण गरेको स्थल तनहुँ जिल्लाको दुलेगौडा भएकाले किशोरीले तनहुँमा पीडित युवतीका बुबाले तनहुँमा किटानी जाहेरी दिएका थिए ।
बुधबार प्रहरी कार्यालयमा पीडित किशोरीका बुबाले दिएको जाहेरीमा छोरीले विगत तीन महिनादेखि काममा मन नलगाएपछि, एकोहोरो बस्न थालेपछि कारण खोतल्दै जाँदा अभिनेता पल शाहले देखावटी मायाप्रेम बहाना गर्दै जर्बजस्ती करणी गरेको खुलेको दाबी गरिएको छ ।
पलले ती नाबालिक गायिकासँग विभिन्न गीतको सुटिङ गर्ने क्रममा पोखरा, चितवन, बागलुङ, तनहुँ समेतका स्थानमा सुटिङ सकिएपछि राति होटलमा बास बस्ने क्रममा पटकपटक जबरजस्ती करणी गरेको आरोप पनि जाहेरीमा उल्लेख छ ।
पीडितका बुबाले दिएको जाहेरीमा पलले ०७७ चैत ३१ गते बागलुङको गलकोट महोत्सव जाने आउने क्रममा ती नाबालिगमाथि गाडीमा सँगै बसेर यात्रा गर्ने क्रममा संवेदनशील अङ्गमा चलाउने, जिस्काउने, समात्नेजस्ता कार्य गरेको समेत उल्लेख छ ।
जाहेरीमा उल्लेख भएअनुसार त्यतिबेला उक्त यात्रामा पलसँगै कलाकारहरु दुर्गेश थापा, योगेश काजी, सम्राट चौलागाईं, कृष्ण जोशी पनि सवार थिए ।
त्यसपछि गत वैशाख १४ गते पोखराको एक घरमा रहेका बेला पलले मदिराको तालमा ती नाबालिग बसेको कोठामा गएर ललाइफकाई ‘बिहे गर्छु, धोका दिन्नँ’ भन्ने विश्वास दिलाइ असहमति हुँदाहुँदै जबरजस्ती करणी गरेको आरोप पनि जाहेरीमा उल्लेख छ ।
उजुरी परेपछि अभिनेता पल शाहविरुद्ध पक्राउ पुर्जी जारी भएको छ ।
जिल्ला अदालत तनहुँले बुधबार अभिनेता पल शाहविरुद्ध पक्राउ पुर्जी जारी गरेको प्रहरी स्रोतले जानकारी दिएको छ।
स्रोतका अनुसार पक्राउ पुर्जी जारी गरी काठमाडौं प्रहरीमा परिपत्र भइसकेको छ ।
नायक पलको अभिनय रहेको चलचित्र म यस्तो गीत गाउँछु-२ रिलिज हुनुअघि उनीविरुद्ध जाहेरी परेको हो ।
शुक्रबारबाट देशैभरि उक्त चलचित्र प्रदर्शनमा आउने छ ।
