आइसिसी पुरुष टी-२० विश्वकप ग्लोबल क्वालिफायरको सेमिफाइनल खेलमा आज नेपालले युनाइटेड अरब इमिरेट्स (युएई) सँग खेल्दै छ ।
ओमानको अल अमेरातमा नेपालले युएईको सामना गर्ने छ ।
नेपाल र युएईबीचको खेल नेपालीसमय अनुसार दिउँसो ३:४५ बजे सुरु हुनेछ ।
टी-ट्वान्टी विश्वकपमा छनोट हुने लक्ष्य बोकेको नेपालका लागि यस खेल महत्वपूर्ण रहेको छ ।
किनकि, यस खेलले नेपालको विश्वकप यात्राको छिनोफानो गर्नेछ ।
नेपाल आज युएईलाई हराउँदै फाइनल पुग्न चाहन्छ ।
युएई पनि नेपाललाई हराएर फाइनल पुग्न चाहन्छ ।
यस खेलमा विजेता बन्दै फाइनल पुग्ने टोली अष्ट्रेलियामा आगामी अक्टोबर १६ देखि नोभेम्बर १३ सम्म हुने टी–ट्वान्टी विश्वकपमा छनोट हुनेछन् ।
नेपालले सन् २०१४ मा बंगलादेशमा आयोजना भएको टी-ट्वान्टी विश्वकप खेलेको थियो ।
त्यसयता नेपाल छनोटमा असफल हुँदै आइरहेको छ ।
सन्दीप लामिछानेको कप्तानीमा रहेको नेपाललाई मौका रहेको छ ।
छनोटको समूह ‘बी’ को नेपाल समूह विजेता बनेर सेमिफाइनल पुगेको हो ।
नेपालले ३ खेलमा ३ जितसहित ६ अंक जोडेको थियो ।
युएई समूह ‘ए’ को उपविजेता बन्दै सेमिफाइनलमा पुगेको हो ।
नेपाल र युएईबीचको पछिल्लो हेड टु हेड बराबरीको स्थितिमा रहेको छ ।
नेपाल र युएईबीचको पछिल्लो चार टी-ट्वान्टी खेलमा दुबैले २ जित र २ हार व्यहोरेको छ ।
दोस्रो सेमिफाइनल खेल पनि आजै साेही समयमा हुँदैछ ।
अर्को खेल ओमान र आयरल्याण्डबीच हुनेछ ।
आयरल्याण्ड समूह एको विजेता हो भने ओमान समूह बीको उपविजेता हो ।
यो खेल पनि आज अपराह्न पौने चार बजे ओमानको अल अमेरात रंगशालामा हुने छ ।
आजको खेल जित्ने दुई देश फाइनल प्रवेश गर्नेछन् ।
फाइनल खुल्ने दुवै टिम विश्वकपका लागि छनोट हुने छन् ।
