आईसिसी टी२० विश्वकप ग्लोबल क्वालिफायरको आफ्नो दोस्रो खेलमा नेपालले आज फिलिपिन्सको सामना गर्दैछ ।
ओमानस्थित अल अमरेत क्रिकेट रङ्गशालामा ११ः४५ बजे सुरु हुने खेलमा नेपाल लगातार दोस्रो जितको खोजीमा हुनेछ ।
फिलिपिन्स भने आफू सहभागी भएको हालसम्मकै सबैभन्दा ठूलो क्रिकेट प्रतियोगितामा नेपाललाई स्तब्ध पार्दै इतिहास लेख्ने दाउमा हुनेछ ।
हिजो सम्पन्न क्वालिफायरको पहिलो खेलमा नेपालले बलियो राष्ट्र ओमानलाई पाखा लगाउँदै आफ्नो खातामा महत्वपूर्ण दुई अङ्क बटुलिसकेको छ ।
अल अमरेत क्रिकेट रङ्गशालामा नै भएको ओमानविरुद्धको खेलमा नेपालले एक सय १८ रनको सामान्य योगफल बनाए पनि ३९ रनको जित दर्ता गर्न सफल भयो ।
नेपालको आजको प्रतिद्वन्द्वी फिलिपिन्स भने पहिलो खेलमा भारी अन्तरले पराजित भएको छ ।
क्वालिफायरको पहिलो खेल क्यानडासँग खेलेको फिलिपन्स एक सय १८ रनले पराजित भएको थियो ।
टस जितेर पहिले फिल्डिङ रोजेको फिलिपिन्सलाई क्यानडाले दुई सय १७ रनको विशाल योगफल दिएको थियो ।
तर २० ओभर पूरै खेलेपनि पाँच विकेटको क्षतिमा ९८ रन मात्र बनाएपछि फिलिपन्सले लज्जास्पद हार बेहोरेको थियो ।
ग्लोबल क्वालिफयारको समूह ‘ए’ को उप–समूह ‘बी’ मा रहेका यी दुवै टोलीबीचको खेलले अङ्कतालिकामा उतारचढाव ल्याउनेछ ।
आफ्नो पहिलो खेलमा जित निकालेको नेपाल नेट रन रेटका कारण समान अङ्क भएपनि दोस्रो स्थानमा छ ।
पहिलो खेलमा फिलिपन्सलाई विशाल अन्तरले हराएको क्यानडा समूहको शीर्ष स्थानमा छ ।
नेपालसँग पराजित बनेको ओमान तेस्रो र फिलिपिन्स पुछारमा छन् ।
फिलिपिन्सले नेपाललाई र ओमानले क्यानडालाई हराएको खण्डमा आ–आफ्नो खातामा पहिलो अङ्क जोड्नेछन् ।
११ः४५ बजे नै सुरु हुने ओमान र क्यानडाविरुद्धको खेलमा क्यानडाले जित हात पारे र नेपाल फिलिपिन्सविरुद्ध विजयी भए नेपाल सेमिफाइनलमा पुग्नेछ ।
सेमिफाइनल जित्दै फाइनलमा स्थान बनाउन सके यही वर्ष अस्ट्रेलियामा हुने विश्कपमा नेपालले आफ्नो स्थान पक्का गर्नेछ ।
नेपालले आफ्नो अन्तिम खेल क्यानडाविरुद्ध २१ फेब्रुअरीमा खेल्नेछ ।
