१८ वर्षपछि स्पेनिस क्लब बार्सिलोनाले युरोपको दोस्रो ठूलो क्लब फुटबल प्रतियोगिता युरोपा लिग खेल्दैछ ।
जारी सिजन च्याम्पियन्स लिगको समूह चरणबाटै बाहिरिएपछि बार्सिलोना सन् २००३/०४ को सिजनपछि पहिलो पटक युरोपा लिग खेल्न लागेको हो ।
युरोपा लिगको अन्तिम ३२ को खेलअन्तर्गत बार्सिलोनाले आज इटालियन सिरी ‘ए’ क्लब नापोलीविरुद्ध घरेलु मैदान क्याम्प नोउमा खैल्दैछ ।
राती ११ः३० मा सुरु हुने खेलमा दुवै टोलीको दाउ आजको खेलमा विजयी हुनु हुनेछ ।
सिरी ‘ए’ मा निकै फर्ममा देखिएको नापोली लिगको तेस्रो स्थानमा छ । पछिल्ला पाँच खेलमा अपराजित रहेको नापोलीले चार खेलमा जित र एकमा बराबरीको नतिजा आत्मसाथ गरेको छ ।
यता बार्सिलोनाले भने भर्खरै मात्र आफ्नो लय समातेको छ ।
रोनाल्ड कोइमानलाई हटाएर जाभी हर्नान्डेजलाई क्लबको प्रशिक्षको जिम्मेवारी सुम्पिएपछि लयमा फर्किएको बार्सिलोना स्पेनिस ला लिगाको चौथो स्थानमा छ ।
पछिल्ला पाँच खेलमा बार्सिलोना पनि अपराजित रहेको छ । पाँचमध्ये तीन खेलमा जित निकालेको बार्सिलोनाले दुईमा बराबरी खेलेको छ ।
तर युरोपा लिगमा भेट हुँदा यी दुईमध्ये को हाबी हुने हो ? त्यसको लागि आज हुने रोमाञ्चक खेल हेर्न आवश्यक रहन्छ ।
यी दुईबीच पछिल्लो पटक सन् २०१९/२० च्याम्पियन्स लिगको अन्तिम १६ मा भेट भएको थियो ।
पहिलो भेटमा एक–एक गोलको रोमाञ्चक बराबरी खेलेका यी दुवै टोलीमध्ये दोस्रो लेगमा भने बार्सिलोना सफल भएको थियो ।
बार्सिलोनाको घरेलु मैदान क्याम्प नोउमा भएको उक्त खेलमा बार्सिलोनाले ३–१ को जित दर्ता गरेको थियो ।
पछिल्लो खेलमा बार्सिलोनासँग हार भोगेकाले पनि आजको खेलमा नापोली केही दबाबमा हुनेछ । तर अघिल्लो खेलमा गोल गर्ने दुई खेलाडी बार्सिलोनाको टोलीमा नहुँदा उसलाई केही राहत हुने पक्का छ ।
नापोलीविरुद्ध गोल गर्ने लियोनल मेस्सी फ्रान्सेली क्लब पेरिस सेन्ट जर्मेन र लुइस स्वारेज स्पेनिस क्लब एट्लेटिको मड्रिड पुगेका छन् ।
यता नापोलीलाई भने विजयी ओसिमेन र लोरेन्जो इन्सिने बलियो साथ हुनेछ । लोरेन्जो इन्सिने तिनै खेलाडी हुन् जसले बार्सिलोनाविरुद्धको पछिल्लो खेलमा नापोलीका लागि एकमात्र गोल गरेका थिए ।
पहिलो लेगको खेल आज क्याम्प नोउमा खेलिँदा दोस्रो लेग भने फेब्रुअरी २५ मा नापोलीको घरेलु मैदान स्टाडियो डिएगो अर्मान्डो माराडोना रङ्गशालामा हुनेछ ।
